絲絲講場：帽后唔畀乖仔去孟加拉
飛達控股（01100）孟加拉設廠，雖然試過一日停電廿幾次，但已經過咗「痛苦期」，當地工人勤力成本低，人稱「帽后」嘅飛達董事總經顏寶鈴都話孟加拉係公司嘅「Perfect Match」。但一講到有無打算叫兩位公子接手生意，「帽后」立即變番阿媽：「讀咁多書叫佢哋去孟加拉？！」收到，阿媽唔捨得。
激讚投資好地方
帽后兩位公子，大公子依家搞緊ＩＴ生意，細公子就搞基金。帽后話雖然諗過吓退休，但唔會勉強兩個仔接手生意。
雖然唔想阿仔去，但帽后就猛讚孟加拉係個好地方投資做生意，仲話孟加拉可以搵佢做代言人。飛達今年底目標拓展當地廠產能至每月二百二十萬件，依家喺當地有大概三千個工人，年底前可能會請多五百至八百人。
雖然孟加拉營運成本平過內地多多聲，但帽后仍會Keep住內地一千至千五名員工，始終孟加拉配套設施仲係欠咗啲啲。
順口問句孟加拉有咩好玩？帽后即刻耍手擰頭叫絲絲唔好去。明白明白，帽后唱好孟加拉，唔係講玩。
余絲韻