Market Insight：大光燈炒重組概念

對於後市走勢，股民最好求神拜佛恒指唔好跌穿26,732點，否則代表個多月來，高位持續大成交高追的投資者變晒蟹民，個市用咗咁多年先破兩萬五點心理關口，唔通真係去到兩萬八又被綁過？

近排深港通講到如火如荼，深成指大肆擴容，令市場聯想到通車已進入最後直路。對比滬港通，深圳地理位置上只係一河之隔，唔少深圳居民老早趁個人遊落香港開晒戶口，最後經深港通南來資金，會唔會雷聲大雨點小，可能性確實唔細。

古勝冇點你

升四成半

對深港通期望不大

唔信？可以睇番就快半歲大的滬港通，開車前問十個人，九個都話AH股差價會因此收窄，北水會經港股通南來喪炒，向來受制於QFII配額僧多粥少，想入市又無Quota的中國股票基金會對兩市互聯通道極為雀躍。結果點？A股較H股溢價由通車前的1.5%，擴大到現時31.6%，炒AH差價基本上在通車前經已玩完，通車後炒A唔炒H情況反而嚴重過以前。

通車後，滬綜指累積升76%，港股升得13%，後者升幅連前者五分之一都無。話兩市互通窗口活躍咗，就更加講唔上，北向130億元，南下105億元人仔額度，開通以來爆額日數，三隻手指可以數晒。近期成日話滬港通配額增加，深港通殺到埋身，古勝對此期望真係唔大。

科網股隨時反高潮

滬港通下，港股是否全無得着？公道講，又唔能夠全盤否定，至少A股快炒文化，近排有迹象已閃電融入無停板機制的港股，狂升暴瀉的股仔此起彼落，內地莊家出手的既快且狠，就教我哋班港燦「眼界大開」。喺硬發展下，兩市互通對港股係好係壞都已經唔重要，九成九股民點會同你講資本市場發展，最緊要有錢入市興風作浪，佢哋可以繼續沉醉於富貴夢之中。

講番個市，昨日最搶鏡要數9隻入MSCI中國指數的新貴，包括海螺創業（00586）、廣發証券（01776）、綠葉製藥（02186）、及融創中國（01918）等全部逼到班指數基金追貨。

收市後騰訊（00700）出季績，見網龍（00777）、擎天軟件（01297）等科網及軟件股已被炒起。查實美國掛牌的阿里巴巴及京東（JD）上周出完亮麗季績後，網股已經炒過一浸，會唔會趁騰訊業績出埋來個反高潮，昨日至追的真係要留意留意。

過去一年A股狂升，有估計內地股民身家豐厚咗，茅台飲多咗，一些必非要性消費好似百貨、旅遊、奢侈品等等，都會較肯使錢，亦因為咁，銀泰（01833）同金鷹商貿（03308）近排股價長升長有，據聞就係有唔少大媽捧場，百盛集團（03368）卻硬係谷唔起，何解呢？

人行周日減息後，近兩日內地券商無跟減兩融利率（孖展息），以周初兩融餘額近萬九億元人仔，0.25厘等於47.5億元人仔，顯然券商補充資本放貸的速度，仲係及唔上一班賭仔無止境的孖展需求。

趁兩融額度爭崩頭，券商襟住搶都咪話唔和味。但海通證券（06837）及中信証券（06030）股價升咗咁耐，以行業經歷周期高峰下近23倍PE，估值真係唔算平，難怪股價無趁機再爆多一浸。

日後專注資產管理

話時話，數到有炒作的幻想空間，光大控股（00165）應該比純券商股更有優勢，一來內地券商股估值處高位，光控準備將光大証券A股（601788.SH）賣掉，套現銀碼亦水漲船高，反之控股公司折讓關係，其估值較其他券商較易入口，高追相對的safty margin較高。

早前瑞信出報告話，光控賣證券業務，全身投入資產管理生意，於現時A股大牛市下相當有利，估一五至一七年的管理資產規模年增長可以達到三成。睇昨日光控股價升0.85元報27.95元，差些少破周一高位28.4元，不過以收市價計已經創七年多新高，29元樓下買入博重組消息落實爆一浸，唔算貪心。

古勝