格羅斯當年創立太平洋投資管理（Pimco），帶領總回報基金坐上債券基金一哥寶座十八年，畀人叫做「債券大王」叫咗好多年。估唔到舊年成70歲先權鬥失敗，仲要去到唔主動跳槽就畀人踢走嘅窘局，結果由Pimco走去駿利，個基金Size得番佢老人家以前Run開嘅1%都冇。點解佢當時唔索性收山搞慈善？一句到尾，唔認輸囉！
格羅斯以前都話自己「天生係條投資友」，佢老人家近日再開腔，講到離開Pimco嘅感受，佢話咁走法自己都唔好受，但繼續做芬佬就係要粉碎「畀人踢走後廢咗武功」之類嘅惡意中傷，希望透過規模細好多而可以更自主落注嘅駿利基金，話畀全世界知︰我仲好掂！
不過，格羅斯話已經無意由零開始打造間「Pimco第二」，淨係想每日返屋企睇吓自己嗰日有無跑贏大市。話時話，仲叫唔叫佢「債王」好呢可？
余絲韻