小米尋日首次試搞網下賣機，即是要啲一直以來只係喺網上「輪米」嘅米粉，親身落全國嘅「小米之家」實體店去「親身輪」。小米仲驚住啲米粉唔慣，直頭為啲排隊等開門嘅米粉準備埋躺椅、睡袋、零食、水，連啤酒同花生都有，有啲分店甚至搬埋小米電視出街畀米粉睇。幾咁體貼，幾咁驚你冇人嚟圍住啲分店。
今次網店同實體店同步開賣嘅新款小米Note，盛惠2,999元人仔，小米創辦人雷軍話產品已進入貴價手機Level，所以今次開放實體銷售，等米粉摸吓先買放心啲喎。
人就夠多，但幾多係米粉，幾多係黃牛呢可？小米話預咗，所以米粉要用身份證買，每人限買一部。今次一搞，全國各地吸引咗成3,000幾個米粉通宵排隊，都有啲似iPhone開賣時嘅「果粉長龍」。睡袋、啤酒、花生加埋電視，果然得。
余絲韻