絲絲講場：80後CEO：做生意好過買樓

香港樓市仲會升多10%？Penny覺得呢個直頭係疑問。咁佢自己有無樓喺手先？佢手上啲香港資產，近年已經放晒，只係仲揸住啲內地樓。睇樓市睇得咁淡？唔係唔係，Penny話唔係睇淡香港樓市，佢仲話明一定會喺香港買樓，因為自己始終喺香港出世，但總之就唔係依家買喎。

投資其他執三成仲易

佢仲好認真咁同絲絲講，若依家買港樓，不如攞舊錢嚟做其他投資，閒閒哋20至30%回報好容易。咁，即是乜嘢其他投資？噢，最重要嗰句，Penny就係無答！

咁依家唔買，應該幾時買？Penny話，佢個人認為樓市走勢有高有低，既然香港樓價都高咗咁多年，相信有機會回落。咁佢若然遲啲買，港樓首選地點係？Penny話整體以港島地區為主。Well.....

專心搞家族生意強泰

睇到呢到，是否覺得Penny唔多似本地嘅80後呢？冇錯。佢雖然香港出世，但佢家族其實係印尼華僑，喺印尼有唔少業務兼投資，包括地產、酒、重工業等。Penny家族亦係強泰嘅大股東，所以Penny美國畢業後，○七年就加入咗強泰，年中仲睇唔少東南亞及中港地區投資項目。

所以對佢嚟講，投資賺20至30%好容易囉。只係，絲絲同大家一樣，都係一個普通人。

余絲韻