星級分析員卓百德又再自爆羞家投資，嚟警醒吓大家，不過今次有啲悲傷。叫得羞家，蝕光就固然，所以個悲傷位唔喺嗰度，而係呢次同佢夾份投資嘅好朋友過身，卓百德冇咗個朋友兼蝕晒啲投資，個結論仲竟然係「朋友還朋友，投資還投資」。So Sad。
故事開始喺一九七四年嘅肯尼亞，卓百德揸車喺沙漠拋錨，四野無人，唔知點算時，居然有架車駛近停低，好心嘅司機仲幫卓百德整好架車，仲發現大家都係同鄉新西蘭人，一見如故，自此成為好朋友。雖然一個喺香港，一個喺新西蘭，只係間中見吓面，但一樣Keep住友情不變，仲Friend到夾份投資添。
好朋友喺新西蘭做地產，專收地收屋嚟重建轉手或出租，卓百德入股個別項目後，信晒個Friend，全權交畀對方負責，自己只係間唔中畀吓意見。
本來一直好哋哋，點知就喺個項目就快起完時，好朋友忽然離世，卓百德當然大受打擊。
不過，嚟緊仲震驚。好朋友過身後只係三個星期，佢哋夾份嘅地產項目，居然由零負債一夜間變咗高負債！原來，好朋友嘅律師行居然有做埋放數，好朋友之前都有幫襯借錢，好朋友一死，就變咗咁。咁都得？別問，總之好似髮彩咁，立即變又得，得咗。
卓百德呢次連本都蝕埋，但最慘嘅係佢有被「昆」嘅感覺，朋友若將項目做抵押亦無可厚非，但咁大件事唔同佢講聲就真係……呢次教訓係：一、投資同朋友要分開；二、投資咪齋掛住睇Upside，仲要諗定蝕到點，同埋點蝕法。
余絲韻