絲絲講場：債王驚死咒大市陪葬

債王話，死神來了。債王格羅斯上個月才71歲生日，呢兩日就喺Janus Capital（駿利資產管理）最新一份投資展望講「死」，話自己踏入7字頭，覺得「就快玩完」。佢仲話最驚嘅唔係死，而係等死嘅過程。咁灰，乜事？睇落去，絲絲仲灰，事關佢話死神會搵埋個市，話長達35年嘅大牛市一樣就快玩完。

咪住，格羅斯唔只一次唱淡個市，早喺一三年佢已經開過幾次聲，今年一月又多次叫投資者要小心。不過，死神行咗兩年都未來到喎。

格羅斯亦有兜番，話之前啲警告可能係早咗少少，但佢話今次唔同，事關連索羅斯、索羅斯前副手德魯肯米勒（Stanley Druckenmiller）、全球最大對沖基金Bridgewater揸Fit人達利奧（Ray Dalio）、同埋星級基金投資總監格蘭瑟姆（Jeremy Grantham）都係咁講喎。

搬埋啲星出嚟，咁牛市到底幾時完？格羅斯話，同死亡一樣，無人知幾時。話時話，佢係咪由Pimco敗走去Janus，仲抑鬱緊呢可。

余絲韻