絲絲講場：揀Trading Hour慶生日 中證協顯覇氣
喺中港狂牛市下，中資券商可謂出盡風頭，接「大媽」生意都接到手軟，代表中資券商嘅中資證券業協會最近換莊，由交銀國際譚岳衡接替國泰君安嘅閻峰做會長。
下個禮拜二（十二日），中資證券業協會將舉行「風雨同舟八周年答謝酒會」，竟安排喺日頭而非收市後舉行，呢排股市上落咁大，經紀連中午飯都唔得閒食，中資證券業協會咁有信心當日會有大把人捧場，唔通中資券商真係喺股壇話晒事？
官商幾百人畀面祝賀
聽講，今次酒會同新會長就職典禮應該係分開舉行，今次純係協會慶祝八周年。酒會個名咁文藝已夠搶，酒會嘅時間仲厲害，喺上晝十一時十五分開始恭候，儀式中午十二時開始！依家港股大時代，個市睇少一秒都走樣，但中資證券業協會一啲都唔擔心會影響酒會出席人數，除咗特首應承會出席外，仲話已請咗幾百位香港同內地證券業人士、政府官員、同立法會議員出席。
中資券商依家喺香港嘅規模同影響力愈嚟愈勁，滬港通之後，中資機構仲不斷來港做收買佬，收購證券行擴充版圖。
長地股票冧巴傳落實1113
中資證券業協會至今已有超過75家中資證券、期貨及資產管理等機構做會員。咁嘅大形勢，邊個會唔畀面？
另外，長和系重組進入尾聲，由長和（00001）分拆嘅長地股份，唔可以用番和黃嘅13號仔股票編號，咁究竟會用咩新編號呢？絲絲八到，公司已決定採用「1113」呢個同13號最近似嘅冧巴，只等程序正式確認。
余絲韻