孖妹Ｓ檔案：Check吓你算唔算炒股狂
歌仔都有得唱：「我奮力追，追到沒法追……」港股大時代，同一隻股票，一日追幾轉都仲有斬獲，股友唔追就笨！不過孖妹兩位心理學家朋友就話，千祈唔好因為怕執輸而亂買一通，最怕炒股上癮變病態股民，到時就真係「追到沒法分清我是誰」喇！想知自己「股癮」有幾大？即刻做個一分鐘小測驗。
萬：臨床心理學博士 萬家輝
鄒：註冊臨床心理學家 鄒凱詩
陳：東華三院健康理財家庭輔導中心主任 陳福龍
Kitty：我得兩個「Yes」咋！心理醫生話我知，如果有四個或以上，就要注意係咪開始染上「股癮」。
彩兒：我覺得「每日唔入市唔安樂」其實已經係警號，體內日積月累嘅炒股DNA，最終都有機會爆發！
病態炒股與吸毒無異
萬：外國有研究指，「病態股民」會不能自控咁狂揸沽、愈嚟愈大膽挑戰高風險投資、收市後仍然精神緊張，甚至影響食欲同睡眠質素。雖然病態股民至今未有正式定義，但佢哋嘅情況，同吸毒、酗酒等心癮無分別。喺○八年金融海嘯時，我有個會計師朋友，因為按樓炒窩輪而破產，仲要欠債幾千萬。佢形容自己炒股贏錢時心情好high，到後來即使打和、輸錢時，都一樣咁high；返公司咩都唔做，淨係掛住「o禁機」，直情係唔buy（買）、sell（賣）唔安樂。
Kitty：咁誇張？！我最多都係約埋班姊妹出嚟講吓股經啫，其中幾個無投資經驗嘅，都成功開戶喇。
萬：都幾羊群心理喎，大家都諗住牛市「我唔買（股票）就蝕底（執輸）」。其實真係要小心，因為呢種環境下，投資者好易失去自我主宰能力，投資前唔能夠理性、客觀咁考慮個人投資需要同風險承受能力。我認為依家已經有啲（呢種情況）。
彩兒：我有位銀行朋友近日反而變本加厲，返工本身已經隨時隨地可以查價，佢仲連食飯時間都唔放過，實行股票撈飯，佢係咪就快走火入魔？
鄒：雖然目前無數據統計，但「專業人士更易炒股上癮」嘅假設，唔係毫無理據，因為佢哋進行投資，大家更覺理所當然。佢哋身邊每日都充斥各種投資分析同消息，自己又有相關能力、知識，我認識有人甚至會日炒港股、夜炒美股。
專業人士變「自以為是」
陳：上月一位向中心求助嘅事主就係專業人士。呢位工程師認為自己數理計算精準，睇市都可以咁準。佢估大市「久升必跌」，所以不惜大額借孖展買跌，結果依家欠債過百萬。欠債額更多都有，尤其從事證券工作人士，投資額、孖展額都大啲，投資亦更進取，因為佢哋浸淫股海，每日都耳濡目染，又相信自己得到嘅係第一手消息。
Kitty：其實港股Party都未開完，股友們應該仍然贏得輕鬆！
陳：係啊，所以投資失利衍生嘅問題往往有所滯後。根據過往經驗，我估計未來六個月嘅求助個案會倍增。
鄒：相比賭錢、吸毒，因投資失利而求助嘅人會少啲，始終港人普遍對投資睇法正面。你借100萬賭錢會覺得你有問題，但你借100萬買股票，人哋只會話你過分進取。況且，「正常投資」同「病態投資」嘅分別唔明顯，家人好難意識問題嚴重性。
散戶有無「股癮」起？
「多勞少得」終醒覺
自僱人士 余先生
「我讀Year 3嗰年，每日一起身就開壇，對住兩個大『芒』炒牛熊，全日走堂，連阿媽個股票戶口都拎埋嚟炒！係啊，嗰陣真係上晒癮，每次賺蝕都5、6萬上落，但玩咗年幾之後，埋單計數，發現其實只係賺得幾千蚊，簡直嘥我時間，所以忽然清醒。我依家已經唔睇市喇，返屋企睇《大時代》好過啦！」
細股波動「囉囉攣」
浸大財務學系二年級生 鄭橋烽（Keith）
「我啱啱先開始買股票幾個月，想試吓實踐上堂學嘅投資知識，難得又遇上牛市。呢段時間，我試過睇消息買細價股，由於波幅大啲，所以心情的確比較緊張，會成日查價。最近電話亦裝咗唔少財經Apps，睇多咗內地嘅報道同分析，因為中央政策會影響港股。」
趁市旺用盡孖展
半退休人士 關先生
「過去一個月，我嘅炒股注碼加大咗起碼七、八倍。之前只用50%身家買股票，但見個市咁旺，最後都選擇All-in，主力買低殘嘅細價股。朋友堆中我都算係比較投入嗰個，收市後都勤力『做功課』，亦用盡手上嘅孖展額，屋企人都有叫我唔好太投入。不過，我完全無諗過要按樓炒股。其實個市升咗咁多，都係時候要減倉。」
發夢諗住愛股飆
家庭主婦 張小姐
「早前上網『做功課』，先發現自己揸咗兩個幾月隻股建議易名。我覺得個新名好好聽，心諗『改名後第二日股價一定大升』！結果嗰晚發夢，就夢到隻股爆升喇。」
炒到唔想佢收市
家庭主婦 翁小姐
「牛市下無可能唔炒股啦！如果連牛市都唔炒，（第日）一定會好後悔！我每朝早好準時，九點二十分之前一定去到證券行坐定定！連夜晚瞓覺，都諗住要去證券行炒股，根本都唔想佢收市。」
Ben哥教你戒除「股癮」
投身股海廿多年嘅凱基證券董事及研究部主管鄺民彬（Ben哥），經歷過市場多次風浪，曾因金融風暴損手數百萬。但今日嘅佢充滿「正念」，笑言喺股海變幻下亦能處之泰然。佢醒大家幾個錦囊，話你知點樣喺大時代賺錢又不至迷途股海！
1. 謹記「保本」原則，嚴守止蝕
2. 入市前先定下合理的回報預期，堅守投資紀律
3. 避免抱「搏殺」、「賺到盡」等心態入市
4. 分散風險，避免過分集中投資單一或高槓桿投資工具
5. 唔好將「戰績」同人比較，知足常樂
Kitty&彩兒
若有料報畀彩兒同Kitty或有嘢問，可電郵money.biz@on.cc