港匯上周略抽至7.7521收市，加上港股成交連續八個交易日不足二千億元，反映有資金選擇先行食胡。但既然係資金市，現階段只要選擇一些成交無縮得太勁，又或者破位後保持強勢的股份，如果有埋國策支持概念就更加值博，今日就以酷派（02369）作膽，五龍電動車（00729）為配腳。
酷派去年底業績表現唔錯，全年盈利增加47.1%至5.12億元，而近期股價再上，除受惠市場熱炒的「互聯網+」概念外，亦因集團剛公布附屬公司大神網絡與北京奇虎訂立軟件預裝協議，增加市場對兩間公司進一步深化合作的憧憬。
現價買入酷派有人可能會覺得貴，但以去年底業績計市盈率得24倍，從內地資金角度睇可能仍屬吸引，以30倍PE計目標最少睇3.5元，跌穿2.5元止蝕。
配腳方面，五龍電動車自四月復活節長假後以大成交突破去年兩次配股價0.5元，並已確認上破自一一年尾至今的大型蟹貨區，上周從0.6元樓下升至周四的0.77元收市，強勢畢呈，短線可順勢在0.7至0.8元間買入，目標睇大位1元關，跌穿10日線0.63元止蝕。
帥哥