Market Insight：華富仍有值博率

全球大央行齊齊玩競貶的貨幣戰爭，美國要美元強，又要GDP好睇，講咁易咩！在下亦覺得奇怪，咁鬼差的GDP數據，同埋耶倫鴿味十足，一副加息有拖無欠的姿態下，十年美債息不跌反升，上周三晚見過2.08厘創近五周新高，睇埋美匯指數插番落去95水平，似乎醒目錢經已開始在美國股債市身上提款。如果美國低息期比預期長，最終會唔會益到亞洲新興市場，值得大家拭目以待。

二線內房掀炒風

近期，在下回顧不少本地基金，在年初underweight中港股票，未及時轉身，經過四月挾爆之後，落後benchmark情況都幾嚴重，北水南來未炒完，加埋本地薑及外資流入的三股勢力之下，看來五、六月港股仲係可以睇高一線。

古勝冇點你

升兩成半

股市無可能一條四十五度角直線咁向上，長周末關係，加上期指結算後好友都要重整旗鼓，假期前期待已久的調整終於都出現，恒指最多跌403點，收市跌幅收窄至267點，報28,133點，主板成交1,708億元，內銀、騰訊（00700）及中移（00941）回吐，輪到內房股發力，兩隻藍籌內房中國海外（00688）及華潤置地（01109）狂升4.6%及7.4%，炒到二三線一樣，向來鑊氣十足的恒大地產（03333）夠晒誇張，一升就18.9%，報收7.35元創歷史新高。

今浪人行減息降準，對中國出口經濟刺激唔多明顯，中央於是去托股市、托樓市，反而炮製到一片歌舞昇平。事實第一季放寬限購、指導銀行要寬容咁處理按揭申請，上星期在下提過，大行調查顯示，四月上旬一、二線城市交投有明顯改善，內房股遲早嚟料。假期前的跌市，明顯只係一次資金板塊輪動使然，熱錢由指數成分股換落去炒內房股，整體大市氣氛仲係相當熱鬧，估計一線內房爆升之後，本周初炒風好大機會擴散到二線股身上，建議留意世茂房地產（00813）、富力（02777）同埋落後的碧桂園（02007）。

本地券商盼寵幸

貨源落入強者手的中國銀河（06881），果真零舍硬淨，上周四中信証券（06030）及海通證券（06837）微軟之下，銀河仲可以力保不失，收12.74元原地踏步。老友話無論上至豪宅、下至餅乾都比貴客掃光，今日連本地證券行都陸續收歸內地單位，上周民生銀行（01988）以每股0.565元認講88億至133億股華富國際（00952），同時提出每股1.38元要約全購，以上周股價急升到2元樓上，除非傻咗，否則應該無散戶選擇投降。

若以49.7億至75.1億元的作價，本地一眾券商老闆睇見都口水流，恐怕個個都想獲得貴客寵幸之機會，躋身半百億富豪之列。

連同發給民行的新股，華富擴大後股本市值213億至307億元，視乎民行最終認購股份數目而定，去年九月華富股東資本約4億元，加上四月批股予不少於六名投資者攞咗1.1億，以及今次民行注入的49.7億至75.1億元，市帳率已經講緊3.8倍，比老早被染紅的海通國際（00665）約2.2倍為高，對易主兼獲得大筆新注資本的幻想，都算得上一步到位。

貨源落入強者手

不過，股票升跌長遠睇基本因素，短期不能不看供求關係，因為民行持有擴大後股本86.1至90.35%，實質短期華富流通街貨依然係5.5億股。上星期，短短兩日4.8億股易手，在下懷疑有幾多貨已被強者收乾，純睇過去兩日走勢，似乎1.9至2.1元是大戶高追的平均入市價，從炒作角度，短期有1.38元的投降價包底，值博率算唔錯。

若比起其他博被中資睇中的本地證券股，市帳率已經偷步炒晒上去，閒閒哋4至10倍，直頭傳聞當真消息炒咁款，古勝認為貴些少博番隻華富，似乎仲相對四平八穩。

古勝