絲絲講場：王思聰寸雷軍英文丟架
上星期小米部4i全球首發，印度市場咁大，首次境外發布會揀喺印度，無乜出奇，但小米雷軍衝出世界，首次喺發布會上Show英文，就絕對非一般，仲非一般到畀內地超級富豪萬達王健林位公子王思聰係微博「建議」乾脆咪出國。
隨即致歉 自薦翻譯
當日對住台下熱情嘅印度米粉，雷總先嚟打個招呼「Hello. How are you?」，跟住嗰歷史性嘅幾分鐘主要係「Do you like Mi 4i？Do you like Mi Band？……Are you OK？」絲絲睇住片，不知幾想應雷總一句「Are you？」。雷總最後仲講咗好幾次「OKOK」同「腥橋」，無錯，係「腥橋」，嚟答謝支持，用字淺白夠晒親切。
唔少網民話聽完雷軍講英文，自信即刻返晒嚟。王公子王思聰直頭「建議」啲企業家英文唔好就咪出國丟架。
不過，冇耐，王公子尋日就喺番微博上就雷布斯呢件事「致歉」，話「畢竟上一代的企業家沒有我們這代人的條件」。論條件，真係點比得上阿王公子？公子佢自細出國，喺英國貴族學校寄宿，仲係倫敦大學畢業添。阿王公子仲話，叫雷總下次需要翻譯可私下搵佢。王公子咁有誠意，唔知雷軍會否應番佢一句「Are you OK？」呢可。
余絲韻