唔少股民中咗「冧把降」，周圍問人攞「冧把」，專家嘅心水「冧把」更加係引死人。可能畀人問得多，民生証券研究院執行院長管清友，早排就喺微博叫大家唔好再問佢股市喇，仲話「除了股市，我們還有詩和遠方」。
明明係好浪漫叫人去旅行、讀下詩探索生活，眼中只有「冧把」嘅網民又點會就此罷手，網民即刻問「詩和遠方」係邊個板塊？乜冧把？有人玩嘢問是否睇好「文化」同「旅遊產業」？有人仲話參透咗「詩和遠方」嘅聲母拼音（SHYF）同隻A股石化油服一模一樣，玩嘢話要即刻入市。
點知，石化油服自上星期開始係咁升，尋日仲升停板。網民諗多咗變「開口中」，於是，更多人爭住向管院長跪求下輪策略。
余絲韻