香港地一向都叫財務公司做「財仔」，但上咗市嘅環球信貸（01669）執行董事王瑤（Nicole）就唔多Like「財仔」呢兩個字，Nicole咁靚靚，配落「財仔」呢個稱呼，確實有啲啲......絲絲明嘅明嘅。
Nicole尋日同絲絲食飯時大呻，「財仔」個名搞到財務公司形象差晒，佢話其實佢哋做抵押貸款，係屬於最優質嘅貸款類別，近日佢頻頻去日、韓、台搵生意時，人哋都覺得環球信貸好穩健，喺台灣仲屬於「金控」（金融控股），「金控」好聽得多。
Nicole自己都認畀「金控」呢個稱呼冧到，原本公司名有「環球」已經勁，第時如果加埋「金控」，咪即「環球金控」，Nicole不知幾開心。
係嘅，近排股市旺成咁，要炒最緊要有Cash；呢個時候，好多財務公司嘅靈活物業抵押服務，確實幫到唔少手，嗱，係「財務公司」，絲絲冇再叫「財仔」喇。不過，財務公司幫得手之餘，亦可能「唔覺意」搞到個客「家變」。
話說，呢排二按多咗，甚至有三按、四按！銀行抽查下，若發現呢啲二按，會出手叫個客一係還咗單二按，一係加息。絲絲有位Banker Friend嘅客係一對夫婦，聯名持有個物業，點知其中一個靜雞雞去財務公司按咗間屋，銀行查冊打去問個客，咁啱竟由唔知情嘅另一半聽電話，即場火山爆發！嗰位Banker Friend話直頭隔住個電話都聽到「家變」，咁嘅情況，梗係立即退兵收線，以免燒埋過嚟，日後先慢慢再同個客傾。
余絲韻