絲絲講場：經紀抓大媽五一勁忙

前線後勤各有堅持

講到開戶，由於近期港股開戶人數真係多到離譜，絲絲聽聞，前線負責開戶嘅經紀，就因為開戶問題，同做後勤嘅同事嗌晒交，仲互相問候。陰功豬囉！

呢排個市係咁升，眼見咁多人想開新戶，前線人員梗係想盡快完成開戶，等啲客早啲存錢、早啲交易、早啲賺取佣金。聽聞「加急開戶」、「特快開戶」要求，每日真係以百宗計。

嗱嗱嗱，問題嚟喇，本來前線為公司賺錢搵生意係天經地義，但係人都知，香港證監會開戶有一套規定，要認識你的客戶，文件要齊全，程序一大籮。

就係咁，前線同後勤就有衝突。前線就話後勤開戶搞得慢，佢哋「秒秒鐘都係錢嘛」。後勤就話開戶有一定程序要跟，依家已經日日做到死死吓，一日等於以往十日嘅工作；佢哋仲唔單止要做開戶，就連啲多年來唔見影又冇交易嘅客，都突然復活，話要重新Set密碼、存錢、查詢。

不過，呢啲都係Happy Problems（開心問題），有好過冇嘛，事關咁嘅大時代下，間間證券行啲花紅同獎勵都好和味。

好似耀才話雖然同事忙到邊聽電話邊食飯，但相信未來幾個月都有即月花紅出，仲希望每次都有半個月糧。致富就話呢個月後勤有幾日加班加到凌晨一、兩點，好多同事仲忙到傍晚六、七點先得閒食晏晝，不過近月嘅獎金多到有成半個月人工，仲未計公司旅行去台灣咁呢。

所以話，乜嘢Problems都係Happy Problems。

余絲韻