孖妹Ｓ檔案：狂牛市爭客 券商狂賺靠股

出即月花紅慰勞員工

陳：耀才證券（01428）執行董事兼行政總裁 陳啟峰

Kitty： 港交所（00388）月中試過單日爆升48元，嚇到我心肝仔都跳埋出嚟。

本地券商生意爆升	陳啟峰指出，公司計劃增聘五成人手。	郭家安指，公司開戶量及生意均按月急增。（潘國禮攝）

陳： 耀才前線員工今個月喺港交所爆升後更忙，兩周內都開朝八晚十二，開戶人數按年增加10倍，新客戶男女老幼，乜國籍都有，平均開戶金額100萬元，生意額亦急增5倍。員工忙到一邊聽電話一邊食飯，相信未來幾個月都有即月花紅出，希望每次都有半個月糧啦！上年公司以每股1.29元價位送股權畀員工，平均每人有5萬股，唔少人近期沽出一半獲利，都算係慰勞佢哋，依家我哋爭取緊10月再送多啲。

張智威表示，公司今個月生意額按年增加五成。（何頴賢攝）

鄭蓓麗估計，深港通推出後港股成交或更癲。

增聘人手 添置伺服器

彩兒： 香港證券仲未完全無紙化，唔少人近排將陳年倉底實貨提到分行做登記喎。

陳： 係啊，我哋結算部員工喺復活節假後做到連續通宵3日！部分人150元買入港交所，目標價睇300、400元，以為要揸2至3年先到價，所以咪將實物股票放入保險箱，費事自己手痕太早沽出，誰不知股價突然飆起上嚟，所以就拎去證券行存倉。

Kitty： 港股成交可能有升冇跌，遲啲仲有深港通，你哋點應付？

陳： 耀才本周四及五會舉行招聘會，計劃增加五成人手，前線約佔七成，擅長普通話者優先；另交易系統亦將進行提升，目前已斥資200萬元預訂伺服器，未來可應付港股6,000億元成交的落盤情況，預計今年整體營運成本會提升約兩成。

SMS即市推介冧客戶

郭：致富證券投資銷售部董事 郭家安

彩兒： 你哋呢期部分分行，一星期開足七日，好搏命喎！

郭： 冇計，我哋開戶量按月急增逾10倍，生意額上揚3至4倍，仲勁過○七年，其中上水、屯門、旺角及將軍澳分行特別旺場，連非旅遊區亦有內地客開戶，內地客佔整體新客戶兩至三成，因應客戶需求，除將軍澳分行七天營業外，更同步延長旺角分行營業時間。致富已落實再添一間分行，係恒常七天營業網點，最快六月底開張，不過公司已有20個網點，暫未有再開店計劃。針對成交額飆升，已將落盤系統節流量提升一倍，現每秒可處理約100宗交易，確保客戶落盤順暢。

Kitty：你哋點留住客戶個心？

郭：唔少板塊月內累升已多，所以未來將舉行多啲關於挑選落後板塊嘅講座，而公司發言人鄧澤堂及莊志豪都會落行，帶西餅為股友打氣；顧及市況變化愈趨急速，未來仲會喺每日唔同時段，透過手機訊息傳送即市推介予客戶。

半月人工獎前線同事

彩兒：近排咁忙，公司對員工有乜表示？

郭：唔少客拎番陳年實貨落行做登記，希望睇位出貨，所以今個月有幾日，公司後勤要加班到凌晨1至2點，而且因為開戶量大增，星期六、日都要返公司整理文件，好多同事中午買Lunch，忙到傍晚6至7點收工先得閒食，連我都要幫手接聽電話落盤。

不過，同事等咗8年先再有大牛市出現，所以好把握機會賺錢，前線人員對「額外績效獎金」期望好高，近月獎金已到上限，相等於約半個月薪金，而且喺過去復活節，公司有30人一齊去台灣玩，聖誕節或者會再搞公司旅行等同事開心吓o架。

增辦內地講座擴客源

張：信誠證券聯席董事 張智威

彩兒： 內地客係本港券商新客源，你哋有乜吸客絕招呀？

張： 信誠今個月生意額按年增加五成，日均有約30名客人開戶，內地客佔三至四成，主要以現金戶口為主，小部分進取投資者選擇以孖展形式開戶，不過，唔少股民於○七年近32,000點已開戶，所以今次反應冇當時咁大，希望可維持每日20戶嘅目標，未來會考慮增加舉辦內地講座吸客。

我哋仲有沿用經紀制，目前主力靠經紀「Friend搭Friend」介紹新客，公司都會喺WeChat同facebook等平台每日上載大市評論及定期優惠資料，吸引客戶使用公司服務。雖然經紀同事做到冇停手，個人又試過傾緊一部手機，另一部手機及公司電話同時響嘅經歷，但目前我和同事都支持得住，公司未有打算增加分行網絡與人手，而且水頭充足，未有上市打算。

續推零息抽iBond益客

Kitty： 股友有乜着數先？

張： 五月份信誠會繼續推出「零按金、100%孖展、零利息』嘅抽iBond服務，客戶只需付100元手續費。公司已為此計劃預留6億資金，雖然大市旺盛勢影響iBond銷情，但認購成本好低，只需要打個電話就得，到最後我哋會提供回購價，主要都係想客戶開心！滬港通起，落盤系統已進行升級，為配合大牛市，在孖展成數方面希望相應提升，助客戶捕捉升浪，目前公司孖展息口為8%。

軟硬件升級揼本千萬

鄭：時富金融（00510）投資服務部行政總裁 鄭蓓麗

Kitty：上月底中證監公布內地公募基金可以用港股通買賣港股，好似北水洩洪咁。

鄭： 時富金融今個月生意額按年躍升3至4倍，開戶人數有3倍增長，由蚊型戶至機構投資者都有，有超級散戶一嚟就好大手筆，單日已超過1億元成交。

我估深港通推出後，港股成交或更癲，始終深港只是一水之隔，當地投資者熟悉香港市場，而且深圳人炒股嘅活躍及熱愛程度遠高於上海人。仲有唔少公募及私募基金基地都設於深圳，個人曾見過一隻私募基金產品需募資約5億元人民幣，但竟然兩日內已完成集資，資金多到你想像唔到！

深港通請內地客遊港

彩兒： 你地預備點迎接北水？

鄭：我哋今年主力升級集落盤、報價、內地新聞與點評等功能嘅手機應用程式，務求軟件可跨手機平台應用，下個月個App就會面世，未來會加入Basket Trading（一籃子或板塊交易）功能，散戶都可以好似基金經理咁由板塊中選股及沽出股票。當然都唔少得更新交易硬件設備，預計軟硬件投資額過千萬元，亦希望增聘IT、交易與結算等部門兩成人手，預計支出增長為一至兩成。

公司又研究緊喺深港通推出後，以包內地客戶食宿、交通費嘅免費本港觀光團吸客，到時會視乎開戶金額安排入住迪士尼及其他星級酒店；而港人客戶嘅可以參加深圳的兩天免費純玩團。

Kitty 彩兒

若有料報畀彩兒同Kitty或有嘢問，可電郵money.biz@on.cc