Market Insight：匯源不妨跟番轉

內銀股抖氣，滙控由大笨象變做小飛象，罕有的成為藍籌升幅王，周五有4.2%進帳，貢獻指數127點。四月初，第一波升浪由北水南調，狂炒重磅中資股及重組概念股帶動，上星期有迹象資金分流至其他藍籌及三、四線股，升市形態在轉變，對滿倉股票，卻未能受惠四月升市的投資者，相信點都有機會嘗點甜頭。

睇番期指戰場，上周四，四月國期24萬張未平倉合約，連埋五月8.1萬張，約32萬張，印象中是又創紀錄。都仲未計六、九月國期及恒指期貨，單係即月同下月國期等值已去到2,327億元，意味國指短期每一個巴仙上落，值23.2億元。賭得咁大，有趣係現貨成交縮番落二千億元樓下，今個星期三期指結算，好淡期指客相信會主導大市，爭取結算價的互相廝殺，好可能精彩過睇《復仇者聯盟2》。

古勝冇點你	萬里長空	累升兩成二

保增長要穩住樓市

以往人行降準，很多時都以25或50基點的小幅微調出手，故上周突然出到一個百分點降準，陰謀論認為，係因為中證監講錯嘢引發中港股市場外期貨急跌，一心托市之舉。經過一周思緒沉澱後，古勝仲係懷疑，人行又點會追住股市大媽鼻息去做人咁簡單。

事實上，中國第一季GDP增長得7%，又比去年全年的7.4%繼續下滑，總理李克強口裏說大家要接受較低速的增長，惟去年十一月至今，手底裏卻係從未停過出招，不斷放水。中國首季出口認真麻麻，零售銷售增幅放緩態勢未變，加埋反貪打擊，力谷內需平衡出口經濟的國策，已經證明唔掂。樓市唔冧得，確實好可能係北大人的底線。

睇番首季地產商開發融資總額，下跌2.9%，是十七年來最差，狂放水頂住樓價，同時導引銀行更有效率提供按揭支撐樓市活躍度的措施，肯定今年內仲陸續有來。

在下仲未決定到，係買高負債而項目較集中一、二線城市的發展商抑或睇番一啲十幾厘息的內房債券，博人行再減息。不過，主觀睇，阿爺撐住之下，內房股今浪又死唔去，幾乎係可以肯定，情況同○九年有啲相似。

南方航空（01055）首季虧轉盈，按中國會計準則股東應佔溢利19.03億元人仔，相對去年同期的3.06億元虧損。期內航油價跌，營運成本減近一成，是逆轉關鍵，較意外反而係，燃油附加費削減的同時，收入有6.8%增長。看來A股旺盛唔單止刺激到白酒一類奢侈消費谷底反彈，航空市場需求都旺盛起嚟。以街外主流估南航今年賺50億至55億元人仔，似乎仲有被重估的空間，11倍PE左右唔算貴，唯一要過心理關口，係今個月股價經已累積升四成二，唔怕執輸又心口掛個勇字至夠膽衝入去。

個市開始禾雀亂飛，資金開始四圍搵機會，留意到上周四、五，匯源果汁（01886）成交異動。

交投異動或有後着

一直有留意匯源，因為近排真係消息多多，先有三月中中泛（00715）經第三方買入匯源7.9%股份，一四年度業績盈轉虧後，公司高調搵曾任職可口可樂的梁家祥出任高級副總裁，全面執掌公司生產營運。

股齡短的股民可能未必知，匯源同美國可口可樂關係曖昧，○八年可口可樂曾想全購匯源，最終因商務部搬出反壟斷法，怕此舉搶埋非碳酸飲品市場而被叫停，當年可樂出價每股12.2元，睇番今日個價得2.89元，未夠當年四分之一。

喺連番動作之前，今年一月大股東仲曾經三次增持，今次高調招兵買馬是否有其他部署跟尾？睇佢股價由三月底的2.25元左右起步，炒上四月的3.35元，之後在3元上下區域打滾，調整去到2.65元經已經跌唔落，上周連續兩日成交異動，如果再破3.05至3.1元的短期阻力，應可以跟番轉。

古勝