絲絲講場：長地新冧巴「1113」大熱
和黃（00013）將於六月三日成為歷史，同日由長和（00001）分拆嘅長地股份上市。港交所（00388）今次冇特批，長地唔可以用番和黃嘅13號仔股票編號，聽聞長地想搵番個近似13號嘅號碼做新股票編號。
近似嘅號碼，不外乎係「113」、「1113」、「1313」、「130」同「1300」之類，睇睇先，大部分都有公司用緊喎。「113」係廸生創建、「1313」係華潤水泥、「130」係慕詩、「1300」係俊知......咦，得番「1113」未有公司採用。
13號仔要雪藏成年
有研究開公司股票嘅人士話，估計長地真係有可能會揀「1113」做股票編號，事關估佢哋喺13號前面加其他數字，大機會過喺後面加。有迹可尋，嗱，睇番長和旗下嘅TOM集團（02383，前稱TOM.COM），未轉主板之前嘅股票編號係「8001」，而匯賢產業信託係「87001」，兩個冧巴都配合住長江一號，而且都係喺「1」前面加其他數字。
咁13號仔會點？港交所話，和黃除牌後要交回13號，然後雪藏12個月，等啲經紀與股東提貨轉名。點解要雪成年？因為有啲股東可能遲遲唔提貨、又或者有股東喺海外或身故需要多啲時間辦手續。照咁睇，邊間公司想用13號，就要喺明年六月左右出手，手快有、手慢冇！