理財Campus：股民賺到笑 慶功斟戰略

一行12名散戶於收市後齊齊在魚缸出發，包車前往酒樓享用魚翅和鮑魚全包宴。今次活動發起人方先生本月獲利不錯，稱「平時有人炒股賺到少少錢就會喺證券行請大家食燒肉，但今趟人人都賺錢，開心咪叫大家一齊夾份食餐好，最緊要有錢齊齊搵！」

小注怡情 回報兩成半

方先生早前持有中國國家文化產業（00745）、寰宇國際（01046）及凱升控股（00102）在短時間內為他贏得五位數字的回報，「我呢啲係小本投資，每隻股平均投資額僅兩至三萬元，最後有約25%的回報已經好開心」。

Grace	趙太	方太

他表示，「平時股友都會約埋飲吓茶、去短線旅行。我覺得炒股都係人生一小部分，賺到錢當然要relax吓，所以叫大家一齊食餐好嘅。」

方生	葵姐	蘇太

飲宴中，平均年紀為五十歲以上，大家都有相當的炒股經驗。年紀最大的股友已有八十三歲，人稱為「嫲嫲」。她說︰「我買股都四十八年，有咩大上大落未見過。今次港股係咁升都唔驚，平常心面對。就好似有人鍾意打麻雀，我哋就鍾意炒股票，由開市坐到收市，同朋友傾股票就開心。」

「嫲嫲」本月雖然暫時只賺逾千元，但對老人家來說，每日賺逾百元已令她相當滿足，身旁的股友都替「嫲嫲」高興，「之前賺得少啲，但依家日日都可以執幾劑，不知幾和味。」

整個晚宴都歡笑聲四起，股友「開心share」近日獲利戰績，分享低買高賺及多年蟹貨鬆綁的故事，全晚股票冧巴更響不停。

八年航運股蟹貨鬆綁

趙太本來手持逾三十隻股票，本月牛市讓「倉底貨」終可脫手，故被視為全枱賺得最多錢的股友。她說︰「我揸咗中海集運（02866）、中國遠洋（01919）及吉利汽車（00175）等股票近八年，今輪市場炒航運股合併，我最終可以鬆綁。」

「跌市造就買入機會」

周一股市一度狂瀉，惟一眾股友照舊「冇有怕」，淡定依然。趙太指，「就算股市出現回調，我都唔驚，因為我最近都係沽貨多，無高追入貨。」

另一位股友方太亦稱，「市況要回一回先叫正常，唔跌反而驚，唔跌吓又點嚟下一個升浪，跌反而畀機會我入市。」

跟住大戶輪流炒

姓名：Grace

年齡：60歲

職業︰退休人士

獲利︰約兩萬元

「我睇成交量買股票，見大戶買貨我就跟入，成數高啲，所以我輪流炒首長科技（00521）及首長寶佳（00103）等。內銀股之前高位買落，後尾跌落嚟好慘，依家升番上去一定會獲利。我睇27,000點係放貨時機。」

舖頭魚缸兩邊走

姓名︰趙太

年齡：60歲

職業︰時裝店老闆

獲利︰可觀

「呢排都無心機喺舖頭，因為證券行同舖頭隔兩條街，有人call我返舖頭就跑返去，之後又跑返嚟魚缸。自己養成咗個心癮，唔係贏唔贏錢嘅問題，係個心已經走咗去證券行，就算無得贏都要去。」

吼騰訊等大價股

姓名︰方太

年齡︰接近50歲

職業︰文員

獲利︰逾一成

「今個月賺到幾千蚊好開心，如果返工仲賺到額外嘅錢已經算唔錯。我會星期六日做定功課，之後會U盤掛，有時老公會幫忙落盤。我返工玩唔到細價股，會買大價股，如騰訊（00700）、滙控（00005）及中興通訊（00763）。」

開市半小時關鍵

姓名︰方生

年齡︰約50歲

職業︰司機

獲利︰逾萬元

「股市最重要嘅時間係開市頭半小時，我會嗰陣做買賣，之後返工。跟住趁食晏時間會再去證券行睇吓個市況，完全無心掛掛，因為每次買任何一隻股之前我都會做足功課。我買嘅股早前無咩點郁，但近日又炒上。」

上癮成日想入貨

姓名︰葵姐

年齡：60歲

職業︰退休人士

獲利︰數千元

「個市升咗成千點，成日都心掛掛，好似個賭徒，心思思想入貨。但自己又無耐性，細價股好多都蝕住走，只係內銀股賺咗少少。」

行街都睇實股價

姓名︰蘇太

年齡：65歲

職業︰家庭主婦

獲利︰數千元

「成個月都好開心，呢隻又升咗啦，就算自己無買都會打電話問朋友沽咗貨未。我哋行街見到銀行有股票機，都會入去按吓價，滿足心癮！」