孖妹S檔案：歷次大升市 贏錢有路捉

97年：炒回歸紅籌熱悲劇收場

許：六福金融主席兼行政總裁 許照中

彩兒：至刻骨銘心嘅大升市，實係九七金融風暴前夕癲升嘅日子。

許：香港喺九二年引入內地國企股，當時本港大型股唔多，無疑助長九七年嘅投資氣氛，受回歸效應影響，再加上紅籌熱帶動，北控（00392）更創出超購1,200倍嘅紀錄，真係一股難求！

Kitty：我有做功課！九七由四月11,951點開始，八月高見16,820點，十月就爆發金融風暴，直插到翌年八月6,544點，提起都心慌。

許照中	尹滿華	胡李察

內地漸奪港股定價權

許：當年大戶主要投資國企股、紅籌股與本港大型企業，不過，呢啲就唔係散戶嘅主打，因為當年仲有唔少莊家活動，好多股仔畀莊家炒高晒，散戶好鍾意追呢類莊家蚊型股！後來細價股孖展引致多家券商嘅財務問題，部分仲要執笠添。

七三年大升市嗰陣，真係連僧人同菜販都去證券行趁熱鬧，九七年股民成熟咗，加上交易電腦化，唔使再寫黑板，反而好多股民都埋首做功課，對買股tips都渴求咗，唔多唔少造就今日嘅財經名嘴。再者，當年冇乜內地客，除本地投資者、散戶以外，其餘就係外資基金，真係今時唔同往日。

彩兒：究竟過往跌市有乜警號？

許：可由散戶慣性做分析，今次好多人睇好後市，主因大升市首兩日，沽貨嘅係本地散戶，股市低迷太耐，佢哋唔信已進入升市，仍存有戒心，股票就落入大戶手中，所以會覺得今次個市有排玩。不過，一旦個市不斷升，多散戶忍唔住手回頭入市追番之前過早沽出嘅股份，就要有心理準備個市升到盡。

Kitty：啲人成日話港股估值平，真係咁抵？

許：香港係國際市場，評定港股估值嘅話語權素來落喺歐美基金，係港股估值長期被低估主因，但目前港股成交逾七成係內地企業，隨內地機構投資者資金湧港，日後部分話語權將落喺佢哋度，估值亦會隨內地走，相對A股估值，港股實在平到唔合理。雖然內地金融企業競爭劇烈，但經濟體系龐大，淨係支票戶口同信用卡市場潛力都好大，所以以往價值長期被低估的中資金融股前景不容忽視，特別係銀行股有排升！

07年：贏輸皆因「港股直通車」

尹：傲揚集團投資總監 尹滿華

Kitty：○七年「港股直通車」係滬港通前身，嗰次大升市有幾架勢？

尹：中央當年八月計劃試推，一度刺激港股兩個月內爆升近萬點，同年十月底仲創出31,958點歷史高位，不過，為免內地投資者接火棒就叫停「列車」，再加上金融海嘯，令股市下挫至翌年十月10,676點低位；A股受惠股改及金融改革，滬綜指在○七年十月中觸及6,124點歷史高位，其後就步入七年大熊市。

當年中港兩地已達致全民皆股狀態，股票係茶餘飯後嘅話題，但喺今次升市中，由於不少成熟或機構投資者經歷當年一役後猶有餘悸，所以通常跟得唔太貼。不過，內地股民大多是80、90後，唔識死字點寫，所以傾向極進取。

今次升浪可破○七高位

彩兒：投資題材係咪同依家一樣？

尹：當年內地股民專炒大股東有機會送股嘅股改概念股，以及推出股權激勵計劃嘅股份，相關A股郁啲就升停板，喺炒風凌厲下，中信證券（600030.SH）市值曾經勁過國際投行高盛；另邊廂，流入港股嘅資金就依次追逐AH價差股、內地缺乏嘅板塊及傳統大藍籌，最後就輪到P/B（市帳率）細過1嘅公司，即包含眾多細價股。

如果買賣timing啱，合埋眼求其買入一隻大價股，好似國壽（02628）、招行（03968）、中移（00941）等都會賺到笑，不過，一旦嗰陣高位接貨，喺中央叫停通車後又走唔切，揸到依家都未返家鄉啊！

Kitty：究竟大市到頂未？

尹：近年內地打擊信託產品，要製造財富效應推動內需，可行嘅另一出路或者係做就「國家牛市」，估計內地4,000點未到頂，即使有調整，幅度都唔會大。A股累升已多，吸引睇好內地股市嘅投資者轉投港股懷抱，由港元多次觸及強方保證水平就印證到，預計今年港股會升得勁過A股，若滬港通門檻可以取消，實會掀起三、四線股炒風，再加上深港通推出，港股勢打破○七年近32,000點高位。

今次：身處大時代 點贏錢？

胡：散戶 胡李察

彩兒：輪王，聽聞你趁港股大時代嘅開首，喺5個交易日內將60萬元投資本金，翻升逾8倍至500萬元，仲要淨係單靠兩隻港交所（00388）認購證。

胡：港交所係香港主要嘅「賭場」，佢150元時，港股約有500億元成交，目前成交係當時4倍，而且內地放寬證券開戶限制，內地股民有可能搬錢來港投資，仲要有機會做孖展添，可見收入增長強勁。我喺185元水平開始，已不斷逢低收集兩隻港交所Call輪，股份正出現旗形突破300元的心理關口，所以我計劃喺350元先開始減磅，靠佢都可以退休印印腳喇。

確認升勢分批買入

Kitty：你投資極集中，點控制風險？

胡：我主要利用三角型投資法，即以金字塔形式，喺股份上升時分批買入股份，以十分之一資金小試牛刀，確認升勢便以十分之二、十分之三，如此類推加碼，沽出股票都可以沿用同樣方法。最重要是訂立10%的止蝕位，嚴守紀律。

我嘅投資心法係順勢而行，喺資金市「行走缸湖」，可利用財經軟件留意開市首30分鐘的50大成交，找出過去數天股價曾調整的股份作投資，而且只玩貼價的大價股窩輪以降低風險。

彩兒：你咁有自信，實係因為喺○七年大升市時，同樣單靠認購證刀仔鋸大樹，將資金翻升15倍至800萬元，仲喺32,000點高位套股換樓，買咗三層樓，避過金融海嘯。

胡：當時我主力靠末日輪食胡，最記得係喺○七年升市初期，曾以一注獨贏方式買入長和（00001）Call輪，賺幅一倍，日賺100萬元；另在升浪到頂的最後一役買入恒生（00011）Call輪，將本金翻倍至250萬元。

彩兒、Kitty

若有料報畀彩兒同Kitty或有嘢問，可電郵money.biz@on.cc