Market Insight：體品股最壞時刻已過

香港炒家個鼻莫非特別靈？抑或丁蟹威力大？上周五收市後，中證監例會上提到關注內地融資融券規範與風險管理，亦有新計劃激活沽空市場，等淡友借貨可以方便些少，一句講晒，中南海見個市炒到合合，揮動指揮棒為A股降降溫。

股民或者覺得熟口熟面，今年一月十六日，又係星期五收市後，中證監懲治一批券商，打擊違規孖展放貸，之後的周一復市，股民以「一一九慘劇」去形容，滬綜指及國企指數飛插7.7%及5%。睇番上周五，恒指夜期跌2.55%，國指夜期跌3.42%，會唔會歷史重演？

古勝冇點你	萬里長空	累升兩成四

趁機撈內銀內房

在下向來唔相信同一原因，會發展出一模一樣的結局，結果中證監周末加班，經微博澄清，無打壓股市意圖。查實單係睇第一季GDP得7%，一步一步去到中國穩增長範圍的底線，減息放水又谷唔起進出口經濟，退而谷起股市，製造等一小撮股民富起來，都係無辦法之下的辦法。

除咗中證監怕股民亂諗嘢，表明心迹話無打壓股市之意外，人行尋日更出嚟降準，斷估若然今日低開，一直畏高無貨唔敢衝的，反而可以諗諗趁機撈吓貨。上周四、五初見回吐的內銀，會係較四平八穩之選，大的有工行（01398），細隻啲的交行（03328）及招行（03968），今日可以瞄一瞄。

今浪內房股相對落後，一來係大媽集中火力，賭AH差價收窄，追「互聯網+」，再搭埋「一帶一路」，實行三穿七過關，相比之下其他無古仔炒的，門前相對冷清，尤其人行減息兼降準之後，春節返嚟，三月內地樓市銷售爆升幅度唔算大。可是三月底針對房貸的政策出台，加上股市人人魚翅撈飯，在下見唔少內地炒股群組，大媽口氣大到不得了，話今浪搵唔到一兩層樓等同輸錢。四月初內地樓市銷售數字，又確實好番唔少，由券商數據所見，北京、上海、廣州等一線城市，首星期成交按年勁升95%、85%及57%。

在中央新政策下，家庭第二套房的需求開始陸續浮現，對穩定樓價漸漸起到作用，可以相信，三月份之後，四月的內地大城市銷售數據，會有較明顯的改善，估計臨近四月下旬，會有唔少春江鴨部署好晒，今年大落後的內房股，短炒長揸皆宜。除了華潤置地（01109）與中國海外（00688）兩隻穩陣膽之外，細隻啲心水仲有世房（00813）、雅居樂（03383）同埋合景泰富（01813）。

反貪之下，內地零售業一池死水，消費零售、百貨超市的生意無不受到衝擊，大款鍾情送禮的蟲草、花膠、名錶等，在香港的炒價無不急跌，可見一斑。可能貪官與大款鍾意運動的唔多（講笑），上星期幾隻體育用品股走勢悅目，一來行業較其他零售行業更早走入調整期，去庫存做得八八九九，業績最壞時刻唔少在一四年前見咗，今、明兩年好可能谷底反彈。

舊年特步國際（01368）賺4.78億元（人民幣‧下同），按年跌21.1%，業績比大行預期差，主要是為1.27億元應收帳作一次過大刀闊斧的撥備，對比一三年同類損失5,120萬元，大增148%。睇番特步業績，經歷一二至一三年的調整，收入由55.5億跌到落去43.4億元後，去年銷售情況見站穩陣腳，回升至47.7億元，銷售毛利亦由17.4億回升至19.4億元，毛利率也穩定，由一三年的40.2%回升至40.8%，與一一年度的五年高位睇齊。

派送慷慨成賣點

有分析員認為，撥備大增，一來令應收帳日數維持外，也想趁機令一五年的復甦做得更加好睇，等部分多撥的可以在今年出現回撥，保守估計一五年盈利應可順利突破6億元，以65億港元或約50億元人民幣市值，市盈率8.3倍。

特步另一賣點是派送慷慨，過去幾年維持五成以上派息比例，業績後股價落過去2.18港元，近期跟大市蠢蠢欲動，返到3元樓上，估值唔貴加埋今年業績人為地爆升的機會十分大，3.2元樓下入市，風險唔大。

古勝