期指觀瀾：企穩27920樓上建好倉
周初大市見28,031點的七年高之後，問十個九個都認為今次北水南下，後市港股易升難跌。
但有趣是，由於過去兩星期升得過急，認識的，個個期待大市先來一次調整，這種想買又要等的心態，顯然就是過去兩日高位牛皮的成因，大市在跌唔落又唔願意即時再突破下，高位的回力球遊戲，好容易將太高孖展或者定力唔夠的期指客三震離場。
對比四月復活節假期後的股市大時代，昨日大市都算得上表現「平淡」。期指以27,678點開出，早市在27,862點遇阻力，之後的市況基本是反反覆覆在27,530點樓上運行。到A股收市後，試一試即市低位27,456點，淡友卻未見一舉攻堅的意志，最後日市期指以27,619點作結，平水收市，成交7.1萬張。反而國指期貨多得內銀股強勢之助，走勢相對有睇頭，國期日市收報14,458點，有達13.3萬張成交。
於今個星期，周二及周三的市況基本上是在周一的即市波幅內運行，待變的味道極之濃厚。
即市操作簡單一點，以周一即市波幅27,191點及28,125點作為入市觸發點，升穿或跌穿追勢。筆者對向上破關信心相對較大，未必會等28,125點，只要確認企穩27,920點樓上，會開始追買。
John Mullen