Market Insight：二線內銀爆發力強

古勝驚嘅反而係，萬一短期人行有減息或降準行動，習慣掉轉嚟炒的中港股市，反而有好消息回吐的可能。周初港股掂一掂兩萬八點，一連兩日擺出一副抖氣格，昨日大市升57點收報27,618點，居然有930隻股票要跌。

咁多股票插水，都怪過去幾日實在炒得太癲，尤其一些港股通名單股份，好似國美（00493）、大連港（02880）、輝山（06863）、波司登（03998）及中化肥（00297）等，跌幅介乎5.2至6.3%。當然，對比過去兩星期升浪，仲係濕濕碎。睇番港股通105億人仔額度用得五億幾，公募基金入市依然停留吹水階段，其他偷步入市的春江鴨先至係港股揸fit人。

古勝冇點你	萬里長空	賺足5成

自從四月開始炒北水南調，港股已徹頭徹尾A股化，大媽及地下熱錢炒股口味變化得快，對唔貼市又唔想錯過熱錢盛宴的股民，毫無疑問安碩A50（02823）、南方A50（02822）及恒生H股（02828）三隻ETF，係點都要買番多少唔好執輸的選擇，昨日三隻ETF加埋有達200億元成交。

阿里巴巴又一佳作

三月下旬開始停牌的阿里健康（00241），復牌一次過追番晒。股價井噴式爆升八成，收報12.26元。公司終於落實向阿里巴巴及董事的胞弟，收購在線藥房交易平台，作價為194.48億元，代價以合共32.74億股，每股作價5.28元，以及21.6億元可換股債券（涉及4.09億股及換股價5.808元）去支付。

恐怕股民都懶理到底收購乜家科，睇番通告，收購資產在今年三月底止年度資產淨值220萬元人仔，交易額、未經審核收入及稅後盈利淨額分別係47.4億、1.02億及7,088萬元人仔，換句話，收購價相當於資產淨值7,072倍，市盈率219倍！

阿里到底係咪真係點石成金，未來雄霸內地線上藥品生意，可能要一段時間先見真章，但一注資入去隻殼，計埋潛在發股及可換股行使後的擴大股本，阿里健康總市值去到1,453億元，已經大過藍籌新貴領匯（00823）足足三分之一。五年之後如果佢仲有咁大市值，只能讚馬雲是不世商業奇才，惟家陣衝入去，風險同過澳門賭番鋪分別唔大。

最近老友間爭辯得最多的話題，係今浪算唔算港股牛三。在下站在大好友一方，一來兩萬五點屬於海嘯後多年的重要關鍵阻力，啱啱先突破就話牛三，肯定未見過九七、二千年及○七年的升市。

事實上，單由中港經濟周期仲處於低位轉捩點附近，並非牛三常見的盛極將衰，已可判定後市應有排升。況且，過往港股次次見頂，市盈率都喺20倍樓上，依家11倍多些少，同牛市尾聲拉唔上關係吧！

恒指、國指及A股的平均市盈率低，完全係因為中資金融股超低廉的估值造成。好似龍頭工行（01398）預期市盈率得6.4倍，同國際銀行平均12倍幾有段距離。

當然，同預期內地不良貸款周期已經見底，利率市場化以及中央打晒開口牌要改革「暴利行業」有關，但即使完全無增長，甚至盈利幾年間要跌一至兩成，刻下的估值尚算在合理範圍內，未來中線股市進入大時代，斷估金融股與非金融股估值之差距應有收窄空間。

下載東網Money18 App搶先機

不過，對比下，二線內銀如交行（03328）、招行（03968）可能更值得留意。一來流通量的考慮，爆發力較強，亦都唔似四大行有咁多包袱，背負太多國企及地方政府融資問題，亦都可期較能享受經濟增長回升的轉捩點。

另外，港股持續暢旺，各位看官如欲掌握投資先機，請即在Android的Play Store或者iOS的App Store下載東網Money18 App，隨時睇到心水股票免費報價、A股報價及AH差價等，同時亦有專家即市推介，助你縱橫股壇。

古勝