港交所（00388）股價愈升愈有，尋日最高見過300蚊，股價靚仔到成三張「紅底」，除咗有貨嘅散戶（包括絲絲隔籬嘅同事）會興奮到合唔埋嘴外，絲絲估港交所行政總裁李小加可能都忍唔住偷偷哋笑，事關佢份人工除咗底薪同花紅外，仲包埋獎授股份（即係獎啲港交所股份畀佢），佢呢幾年收埋收埋唔少，到家陣……仲唔哈哈哈。
睇番港交所年報，小加一四年全年薪酬連表現花紅及福利接近2,000萬元，嗱嗱嗱，呢Part都未計佢嘅獎授股份，咁舊年獎咗幾多股港交所畀佢？Oh Sorry，年報上條數，恕絲絲睇唔通，又或者唔預凡人睇嘅。不過，睇番凡人睇得明嘅交易所資料，小加現擁有575,840股港交所權益，以尋日收市價計，批股份值成1.71億元！據絲絲收風，小加幾乎唔會自己買港交所股份，若然呢批值成1.71億元嘅股份係獎番嚟的話，加埋舊年嗰2,000萬底薪花紅，佢嚟自港交所嘅身家至少咪有成1.91億元！
等等！小加收入高得過和黃（00013）大班霍建寧未呢？霍大班舊年酬金約1.96億元，噢，小加仲差少少添。
咁同其他香港金融話事人比呢？證監會行政總裁歐達禮舊年年薪約903萬；而金管局總裁陳德霖（Norman）舊年續任，舊年固定年薪650萬元，加埋佢按表現決定嘅浮動年薪上限260萬元（佢無理由攞唔到上限嘅），再加佢公積金等福利估計應該唔會少過前年嘅近140萬元，咁Norman全年酬金估計約1,050萬元。
咁同外國同行比呢？納斯達克CEO格賴費爾德一三年酬金大概係1.07億港元，紐交所前CEO尼德洛爾同年都有大約1.02億港元，倫敦交易所CEO羅列特舊年年薪就大概7,422萬港元。照咁睇，若果港交所股價Keep住升，小加份人工完全有機會贏晒全世界！
港交所CEO 李小加
2014年底薪連花紅約2,000萬元。另外，他持有港交所575,840股，市值約1.71億元
和黃董事 霍建寧
2014年酬金約1.96億元
證監會CEO 歐達禮
2014年酬金約903萬元（年薪 + 津貼 + 酌情薪酬）
金管局總裁 陳德霖
2014年酬金估計約1,050萬元（固定年薪650萬元 + 按表現計浮動年薪上限260萬元 + 公積金、醫療及人壽險等福利估計140萬元）
納斯達克CEO 格賴費爾德
2013年酬金約1.07億港元
紐交所前CEO 尼德洛爾
2013年酬金約1.02億港元
倫敦交易所CEO 羅列特
2014年酬金約7,422萬港元
余絲韻