孖妹S檔案:息字頭上一把刀 5大陷阱

上星期個市升到癲,孖妹都成功沽走啲陳年蟹貨。不過,有揸住內銀股嘅姊妹就話升幾多都唔放,寧願食息食到老。喺狂牛舞動下,孖妹就唔多Buy呢套,因為齋計機會成本已經好蝕抵。數到高息投資,又點止內銀股咁少?今期一於拆解各種高息產品背後嘅「陷阱」!

內銀財息兼收要低吸

黎:時富金融優越投資服務部顧問 黎永良

Kitty:內銀股上月底齊齊放榜,但四大內銀中嘅工行(01398)同中行(03988)都減少派息,更有報道指佢哋今年可能會削派息比率至30%。睇嚟食息族又少個投資選擇喇!

資產質素參差有隱憂

黎:A股去年尾大漲,升浪由內銀內險股帶動,板塊估值高咗咁多,唔建議投資者再追。就算嚟緊A股繼續升,相信內銀好難再大升40、50%,預期今年表現只會與大市同步。

目前內銀股有三大隱憂:首先資產質素好壞參差,唔排除存在發水資產;其次,人行減息將影響內銀淨息差及利息收入;最後,按《巴三》框架下嘅資本要求,目前並唔係所有銀行達標,所以日後嘅資本監管將對內銀有影響。

彩兒:雖然依然有息收,但小股民最後會唔會蝕股價,搞到「息不抵價」?

黎:咁又唔會,但內銀股投資回報一定無以前咁好。如果想做到「財息兼收」,梗係等佢跌到甩褲先買啦!

港REITs畀美息魔拖累

蔡:越秀証券聯席董事 蔡佑徽

Kitty: 香港近年嘅樓市神話,帶挈靠投資物業、收租嚟支持派息嘅房託基金(REITs),股價同樣愈升愈有,但龍頭領匯(00823)最近都升唔起,唔通佢哋大勢已去?

蔡:相比內銀股, 個人認為投資REITs風險大啲。受惠過去幾年低息環境,買REITs投資者可享財息兼收,但呢個基本因素即將改變,因為美聯儲話今年「一定會加息」。美國低息周期完結,但全球好多國家啱啱先開始量寬(QE),例如歐洲,所以當地REITs嘅吸引力自然大增。以領匯為例,近日股價已較一月高位有所回落而且跑輸大市。

賺息輸價 值博率欠奉

彩兒:哦,難怪市場資金近月棄美投歐啦。

蔡:REITs未來幾年投資價值已經大不如前。若價、息齊跌,派息率當然可以維持,但輸價賺息,其實都無乜意義。

人幣定存高息限制多

盧:康宏理財助理聯席董事 盧艷萍

Kitty:做「人仔」定存有4厘息率回報是常識吧!等我都嗱嗱聲將銀行存款兌換人仔收高息先。

彩兒:唔好懶醒啦,將銀行現有人民幣存款轉做人民幣定存,唔算係「全新資金」,無咁高息!

年期短 資金左搬右搬

盧:無錯,而且人幣定存年期較短,多數只做三、六、九個月,以4厘年息計,其實存款期內利息回報只有1至3厘;若想持續享高息,存戶更需要將資金左搬右搬, 否則定存到期後,存款會自動變番活期存款,息率會低於一厘。仲有,話明係定存,喺存款期內唔可以隨便提取資金,否則一樣會失去高息。

彩兒:舊年人幣貶值2.4%,假如今年貶值幅度相同,已經令人幣定存回報吸引力大減。有分析員更估計,人幣今年會再貶值3%!

高息債券忌違約風險

李:恒生(00011)投資產品及顧問業務主管 李佩珊

Kitty:香港樓價咁高,「磚頭」好難買得落手。有姊妹介紹我買內房高息債券,每年孳息率平均都有6至10厘喎!

李:買高息債一定要注意違約風險,如果債券無違約,投資者由頭揸到尾,係一定收到本金,同時可賺取高息。不過,由於債券本身都有個面值(Par Value),如果投資者喺到期日前於二手市場沽出債券,債券嗰刻嘅價格有機會跌穿發行面值,咁嘅情況下,投資者雖然係收咗息,但就蝕咗個本(本金)。

買基金有助分散風險

彩兒:高息債券基金投資一籃子高息債券,對個人投資者嚟講,係咪更好嘅選擇?

李:無錯,高息債券主攻機構投資者,入場門檻高達20萬美元,而且零售投資者亦好難熟悉企業內部財務狀況。相比之下,高息債券基金入場門檻只需約2萬港元,又有基金經理精挑優質債券,可降低資訊成本,亦有助分散風險。

掛鈎存款最怕蝕匯價

Kitty:回報同風險從來都成正比,雖然外幣掛鈎存款息率超過10厘,但千祈唔好淨係貪高息。如果係不保本外匯掛鈎存款,投資者「接貨」後,需要自己承受外幣貶值及匯兌風險!

李:的確,以不保本外匯掛鈎存款為例,到釐定日時,若掛鈎貨幣嘅結算匯率低於協定匯率,存戶雖仍可收取協定嘅利息,但同時要接貨,即取回按協定匯率兌換成嘅掛鈎外幣。如果掛鈎外幣往後貶幅太大,息率回報未必足夠彌補相關跌幅,所以投資者有機會蝕本。

有外幣需求持貨無妨

李:不過,接貨後只要繼續持有外幣,都唔等於真正虧損,日後亦有機會賺取潛在升值。澳元、紐元、英鎊等掛鈎外幣一向較受歡迎,因為投資者本身對呢啲外幣有需求,例如子女喺當地升學。而恒生「更特息」投資存款(不保本),存款期由一周至六個月不等,有10種貨幣選擇,變化達88種,入場費係5萬港元或等值貨幣。

彩兒:都啱,對掛鈎外幣有實際需求,就唔介意接貨,即使接貨後大幅貶值都無咁「肉赤」!

Kitty、彩兒

若有料報畀彩兒同Kitty或有嘢問,可電郵money.biz@on.cc