Market Insight：光控潛在價值高

熱錢不斷湧入港匯，上周金管局連番入市干預。遠的不提，去年七、八月期間，憧憬滬港通即將通車，港匯曾持續近兩個月貼實7.75。當時恒指由兩萬三樓下，累積升2,402點，對比下，今次只是剛開始恐慌性湧入，大市爆升速度及幅度，都遠比之前誇張，難怪唔少大行策略師急急改口，對全年目標作較大膽預測。

上星期放完假，古勝已經勸大家唔好同無形之手對抗，中國反貪及經濟改革，使內需不足、產能過剩問題浮面，進出口數據差到極，放寬限購之後，內地主要城市三月樓市交投，按月升幅見唔到井噴式爆升，已令唔少樂觀分析員頗失望。

古勝冇點你

萬里長空

短期回調幅度有限

「一帶一路」、「互聯網+」等口號式的產業提升及支持經濟政策，又唔會在三五七個月立即見到成果，內地要避免經濟硬着陸，穩增長保就業的大前提下，中國大媽牽頭發圍，透過借貸推動的股市狂潮，都只有抱住隻眼開隻眼閉態度，等人人股市搵到真銀，製造出財富效果以及繁榮的願景頂住先，是短期可行之法。

上星期大市升得誇張，惟在下估計短期回調幅度唔會太大，一來兩萬五的陳年阻力位已經變成支持，而且唔能夠忽視上周2,500億、2,915億及2,211億元的驚人成交，加加埋埋日均有2,542億元，同二、三月七百多八百億相比，數以倍計。

同時，港股通105億元人仔配額以外，由地下錢莊的港匯溢價統統抽高，可見唔少內地熱錢搶先在「仲未有耐」辦好手續入市公募基金之前，搶飲頭啖湯，透過其他非常途徑入市，而七千多億成交，絕唔係普普通通大媽可以打到出嚟，在下相信，上周大市狂升留下的裂口，完全回補令這批先行部隊坐艇的機會唔大。

客觀現實係，過去超過二十年的港股歷史估值介乎9至20倍之間，由於中國經濟不確定性，加上歐美國家的連環QE，投資者預期發達國家的復甦會較早出現，近年港股估值貼在區間下限附近橫行，即使恒指已經明顯突破，目前大市平均估值亦只得11.5倍左右，距離20倍的危險區域有相當遠距離。

廣証H股折讓吸引

假如中國股市狂潮，之後延伸到落去的「一帶一路」、「互聯網+」，逐漸令市場對經濟走出放緩陰霾的預期掃除，加上中資公司的盈利增長能力復甦，整體大市是有可能來一次中期的大規模重估，三萬二、四萬點甚至更高，也不是癡人說夢。

上周四港股市值超越日股，成為全球第二大股市。中港兩地股市成交屢破紀錄，收益與交易額掛鈎的如港交所（00388），成為全球最貴估值交易所股份。一眾券商股亦炒到飛起，本來花無百日紅，理論上個市愈旺，券商股市盈率應該愈低，但當炒家殺紅了眼，也一於小理。

廣發証券（01776）大折讓定價策略，攞到貨班大孖沙人人叫好，首日開出大升三成五，收報25.4元，較A股（000776.SZ）30.61元人仔，仲有50%折讓，炒AH溢價一眾，短期仲係會螞蟻見到蜜糖一樣。

三隻內地券商統統廿倍PE開外，講真係幾貴，因為控股折讓關係，光大控股（00165）屬於較另類選擇。光控揸住A股掛牌光大証券（601788.SH）及沽剩小量光大銀行（06818）貨尾，去年十一月光大集團股份制重組，光控炒過一輪，見過20.45元，跟住喺15.5至20元之間橫行近三個多月時間，到近幾日至見明顯突破。

下載東網Money18 App搶先機

光控重組，雖然無講明減持時間表，不過近期光大証券收購香港新鴻基公司（00086），擺出一幅大展拳腳姿態。今年股價升21.7%，上周四光証創歷史高位37元人仔，再升，對套現重組可即時釋放超過四成的折讓，洽購其他海外金融投資有着數，就算唔沽住，A股狂態盡現，對光控的價值亦有好處。

另外，港股持續暢旺，各位看官如欲掌握投資先機，請即在Android的Play Store或者iOS的App Store下載東網Money18 App，隨時睇到心水股票免費報價、A股報價及AH差價等，同時亦有專家即市推介，助你縱橫股壇。

古勝