絲絲講場：科網創富 60歲一樣得

不過，Weinman呢個並唔係一個暴富古仔，佢嘅江湖地位係用咗超過廿年時間經營出嚟。

話說Weinman係做特技動畫出身，作品包括《RoboCop 2》（即係《鐵甲威龍2》）。套戲未睇過？哈，係要有番咁上下年紀先會睇過。

Weinman網上教書起家

講番Weinman，佢九三年喺學院教Computer Graphics時，想搵啲書教班學生點將啲作品發表上網，點知當年呢類書，本本都係外星文，只預寫畀程式員睇。於是，Weinman索性自己出書教網絡設計，勁受歡迎。佢之後成立lynda.com，○二年推出網上課程，至今超過400萬人上過。

呢位Auntie除咗喺迪士尼等開過班，仲做過微軟、Adobe同Macromedia嘅顧問。又因為Weinman對個個好似對屋企人咁窩心，令lynda.com成功撬咗Apple呢類大公司唔少人才，甚至有人稱佢為「互聯網之母」。咪再以為，畀科技巨企用重金買起，係八、九十後嘅專利。

余絲韻