絲絲講場：雷軍提起「山寨」就火滾
雷軍一○年創辦小米，一一年推出第一代小米手機，到舊年仲打低三星同Apple，成內地智能手機一哥，仲係全球五大手機生產商之一。今時今日，佢心裏面最大嗰條刺係乜？應該係「山寨」兩個字。嗱，咪諗錯隔籬，睇埋落去先。
「無假貨銷量多兩倍」
雷軍前日喺北京開記招，大呻小米被山寨貨拖累業績。佢話舊年小米移動電源賣出1,460萬個，無假貨嘅話銷量至少可以多一倍甚至兩倍，仲話假貨係小米最大嘅困擾。
呢幾年，小米成日畀人話靠抄Apple模式起家，小米被冠咗個「中國Apple」嘅朵，連雷軍亦被內媒稱為「雷布斯」。
不過Apple似乎唔多Like。Apple高級副總裁Jonathan Ive舊年接受雜誌訪問，一提到「中國Apple」，即刻話「我唔覺得係讚囉」，仲話「當你用咗七、八年去整樣嘢，跟手就畀人抄咗。好明顯，嗰啲係偷嘢同埋懶，我覺得完全唔OK喎」，態度又狠又直接。
余絲韻