絲絲講場：股壇集郵男愛古票
呢幾日中港牛市炒唔停，切忌同股票談戀愛是常識吧！絲絲估唔到，證券行大華繼顯（香港）聯席董事陳卓華（Ray）對另一種「票」好有感情，仲係好長情嗰隻。佢鍾情嘅就係郵票，佢係一個真正嘅集郵男。
阿Ray話，佢買股票比較抽離啲，但買郵票呢就純粹憑Feel！雖則Ray做證券行日日對住啲股票，佢對郵票份感情，真係完全兩回事。
郵票無價 唔同股票
佢話，兩種票好唔同。買股票就客觀判斷幾時止蝕、短炒定長揸；但郵票呢，佢就真係買多賣少，九成九長揸，皆因郵票用得一張少一張，好少翻印所以好有紀念價值。
佢其中一Set心頭好，就係啲日本卡通動漫郵票，佢鍾意儲動漫郵票，係因為構圖同色彩都靚，仲勾起好多童年回憶。絲絲見，又叮噹、又鬼太郎咁，原來Ray係嗰個年代嘅。阿Ray話好多郵票仲係只得一張，所以唔會賣，除非身邊有朋友好鍾意好鍾意，佢或者會考慮吓啦。
愈係舊版價值更高
阿Ray又話，永遠係舊版郵票嘅價值愈高，唔似股票咁可能有IPO或者供股。仲有，郵票有郵Chop同無郵Chop都會令佢變成獨一無二。有時朋友唔識貨，就送啲好嘢畀佢，所以佢話講價值都係要睇有無知音人。
阿Ray集郵已經接近30年，點解鍾意？原來有段古，皆因佢生命中兩位重要嘅男士，就係阿爺同姨丈。佢爺爺當年「行船」，成日四圍買郵票畀佢，再加埋有個做郵差嘅姨丈成日送郵票畀佢。佢姨丈舊年去世，佢想向呢兩位長輩致敬，令佢細細個培養集郵呢種興趣，令佢喺郵票上睇到唔同地方嘅文化、藝術同建築，佢話呢個先係最大嘅Value。
余絲韻