孖妹S檔案：炒股鬥奇招 血型占星推背圖
唔少人閒時會睇吓西洋星座運程，或者從血型睇吓個性咁。呢類少女玩意，孖妹都會攞嚟當娛樂，甚至博大精深到唐朝《推背圖》嘅預言，我哋都有研究過。但係最近收到風，竟然有基金經理同專業投資者會將上述玄學命理元素融入投資，仲練出一身獨到嘅炒技添！
睇血型認識投資習慣
王：易方資本投資總監 王華
Kitty：你成日喺網誌同facebook分享血型投資法，估唔到你同我咁啱Key！
王：呢種方法好科學，血型係與生俱來，反映人類原生性格，唔同地域或者氣候會影響血型分布。A型血人士精益求精，適合群體生活，做事有持續性，肯花時間做研究；B型血人士比較有創新力；O型血人士會傾向目標為本；至於AB型就合A型與B型嘅特點，但有時或者會猶豫不決。我自己就係AB型喇！
有研究話日本A型血人口約佔四成，印度B型血人口佔約四成，中國就以O型血主導。喺投資世界，我認為A型血人士比較啱做長倉，所以日本人搞對沖基金唔太普及，主力都係長倉基金啦！
彩兒：咁揀股票使唔使留意埋管理層乜血型？
王：血型會影響性格，所以我哋可以由管理層嘅血型，去估計公司面對唔同事件嘅反應，最主要係睇主席血型。最巧妙嘅係，老闆會傾向聘請同自己同血型嘅管理層，形成公司文化。不過，A型文化特點係堅持己見，做事有持續性，一旦遇到危機，班人又死都唔肯求變搵出路，咁就大鑊喇！
A型怕輸 B型唔信貼士
Kitty：唔同血型嘅人投資時，乜策略先至啱Feel？
王：A型血投資者性格似農夫，會固守領土，唔太願意發掘新投資領域，鍾意食過翻尋味，特別怕投資出現負數，慣性較早獲利，佢哋不妨每季利用投資組合5%資金發掘新資產類別、其他地區市場及行業板塊、學習其他投資方法，例如沽空；B型血投資者性格似游牧民族，好自我，愛用逆向投資法，唔信貼士，不過就過於貫徹自己諗法，有時都要學吓順大勢而行，因為佢哋愛試新嘢，接受突發性策略，可學做對沖。
O型血投資者性格似獵人，諗法非黑即白，將公司以好壞區分，無灰色地帶，特別堅信目標價。其實呢類人士可以分3至5注買股份，唔好諗一注獨贏。若組合有3隻股份，就可用70%資金買自己嘅「至愛」，20%放喺次選，10%用嚟沽空「至憎」嘅股份。
占星投資用軟件就得
李：申銀萬國證券（香港） 聯席董事 李昌發
彩兒：你占星炒股，成件事即時浪漫咗！
李：以技術、周期分析及波浪理論進行實戰交易，有時會出現技術陷阱，而且只可以作趨勢性判斷，但配合占星同玄學就可以將贏面提高。投資者將占星運用喺金融市場上已有200年歷史。簡單嚟講，我哋可以根據黃道十二宮與相位，再加入過往股市數據作分析，得出唔同相位的升市同跌市概率。「黃道十二宮」就係12星座，「相位」就係喺日心說（以太陽為中心的理論）下行星之間嘅角度。
觀星不一定要用望遠鏡嘅，我依家通常用一個叫Astrolog嘅免費電腦占星軟件，佢可以顯示到黃道十二宮與相位，已好夠用。
測中跌勢賺幅15倍
Kitty：嘩！好深奧啊……可唔可以拎例子解釋我知？
李：「天冥刊四分相」係我比較重視嘅相位，即係天王星與冥王星形成90度的角度，你幻想吓喺個鐘上面，前者處於12點方位，後者處於3點方位，所以形成直角。翻查港股70年代起往績，一旦出現呢個相位，有60%機會利淡，佢喺一三年五月廿一日出現，就搞到港股喺一個月內跌近4,000點喇！
我當時先利用圖表形態同周期分析等方法估計一個月內會跌1,500至2,000點，再加上占星結果令我更確認跌勢，所以個人就運用接近六位數字資金，買入即月行使價價外800點的認沽期權，及後拎利潤再加碼，最後賺幅係14至15倍，本金加利潤亦升至七位數字。
四月四日香港出現過月全食，佢暗示出現頂或底位嘅形態，對港股有70%機會利淡，而且再睇番技術分析，保力加通道上方阻力係25,194點，所以預計現時下跌機會較大。
看推背圖炒A股有賺
潘：散戶 潘彥銘
彩兒：你以前係大學語文導師，唔怪得《推背圖》都難你唔到啦！
潘：因為比較熟悉國情，所以我一向都專注中資概念股，因為研究《推背圖》，令我更確信中國盛世只係剛起步，所以目前投資組合100%係中資股，近三個月更加透過滬股通買A股，年內組合回報約20%。
《推》嘅預言係講中國政治，全書有60象，利用讖詩同頌詩表達朝代、國家及重要人物。第四十四象好符合目前國情，我解讀到讖詩主要係講緊中央政府強力打貪，既得利益者已無力抵抗，往後會趨向循規蹈矩，政府管治效率實會有所提高，加上目前中國主導亞投行，勢得到多國認可，引領亞洲，相信未來20至30年中國經濟前景值得憧憬。
中鐵建H股大墮後
Kitty：你唔驚一掂A股就撞正調整咩？
潘：我會比較留意滬深300指數成分股，專吼中至大型股，貪夠代表性，預計滬綜指年內無特別壞消息，閒閒地會衝破4,000點，指數底部已上移到3,400點。
A股現時佔個人整體組合約15%，我早前喺28元（人民幣•下同）買入全球最大客車製造商宇通客車（600066.SH），睇好佢新能源車業務，打算中長線持有，目標價35元；喺21元水平買入有少少互聯網+概念嘅康美藥業（600518.SH），但26元水平起已開始分段獲利。近期就以192元買入貴州茅台（600519.SH），主因相信目前已經係白酒業低谷，盈利將觸底回升。
彩兒：港股又點玩法？
潘：港股組合中，中國鐵建（01186）係細水長流之選，H股相對A股真係平到癲，而基建股喺亞投行幫助其他國家融資下，生意或可受惠，所以重錘出擊！另一落重注嘅係IGG（08002），作投機性短炒。其餘持股包括國泰君安（01788）同合景泰富（01813）。
Kitty、彩兒
若有料報畀彩兒同Kitty或有嘢問，可電郵money.biz@opg.com.hk