Market Insight：中國南車有力再升

尋日人行進行200億元人民幣的逆回購，同時將回購利率下調十個基點，是春節假期後第四次下調，應付今個星期新股密集發行水緊期之外，亦都反映中央對A股升勢擺出一副默許的姿態。

港股愈來愈A股化、愈來愈追住政策炒，已經係公開的秘密，假期前中證監新指引，容許未有QDII配額的內地公募基金透過港股通入市。

唔使問阿貴，睇見一心要滬港兩地股市互通的計劃，北向固然唔算得上熱鬧，南下更是門前冷清，日日用唔到每日配額一成，阿爺都要諗諗計，誘導一下資金流向，等滬港通計劃唔好太肉酸，做到好好睇睇，博年中MSCI考慮考慮，加埋A股入去，等世界經濟第二強的股市，唔好完全同國際基金經理的投資benchmark拉唔上半點關係咁失威。

古勝冇點你

萬里長空

內房轉強有因

咁樣做另一個一石二鳥的考量，係幫內地基金開闢另一條戰線，唔使逼住貴一貴都只可以炒A股，順便畀AH股差價趨向相對貼近的機會。無論最後真係有幾多公募基金經港股通入市都好，普羅股民實在毋須多想，只要知道中央要個市做到好好睇睇，已經好足夠。

阿爺愈加大力去放水，對股市狂態愈抱住縱容的態度，唔少人對內地經濟就愈加擔心，好似三月內房銷售數據，其實仲係麻麻哋，春節後整體成交量回升，幅度不及市場預期般大，一、二線城市經過春節假後，按月升幅平均不到一成。似乎人行減息，加上減低二套房首期比例及營業稅免徵政策的推動作用，仲需要時間發酵，要睇埋四月份數據，先可以判斷救市政策會否再加大力度，但自從三月中開始，一線內房股股價全線轉強，似乎基金經理對阿爺出招的成效信心十足。

為配合一帶一路國策，同時把自身基建技術與資本出口，中國牽頭成立的亞投行，勢估唔到最後一刻，親美的英國、南韓爭相認錢不認人，加入成為始創成員，睇嚟中國如意算盤唔單止打得響，今次做了亞太區基建融通的一哥，更透過亞投行扶持其他亞太區國家基建為名，順便將內地過剩的基建產能消化，可謂一舉兩得。

配合高鐵外交

十四年前，中國南北車因應國企市場改革，分拆成兩間公司，一來要防止壟斷，同時希望在足夠競爭下作技術提升。直到去年十二月，傳聞一段時間的合併計劃落實，兩間公司又再化零為整。講到底，是要配合中國「高鐵外交」，配合走出去政策，避免開拓海外市場時出現不必要的價格戰及惡性競爭。

事實上，今日全球大約5.5萬公里在建高鐵項目，近半數在中國境內進行，但隨着內地市場建設開始放緩，遇到需求樽頸只是遲早問題，南北車面向世界的部署，有利於把鐵路設備技術由內銷轉出口。

睇番合併消息一出，中國南車（01766）股價一月初炒上12.66元，因升幅過大，故之後足足橫行了近三個月，假期前見成交額明顯增加，股價也重上10元關口樓上。去年中國南車新簽訂單增長18%左右，估計今年盈利增長約24%，17.1倍市盈率，估值唔算得上特別便宜，不過尚算合理，外在消息配合，基金可以選擇有增長故事唔多的考慮下，短期有條件向住12.66元方向進發。

零售股難樂觀

假期期間在下去台灣玩幾日，真係從未見過桃園機場可以塞到咁多人，落機到攞行李足足個半鐘，台北遊客區也處處被內地客逼到爆。睇新聞，日本京都一樣有人滿之患，旅遊熱點清水寺，逼到好似維園年宵一樣，睇嚟假期期間香港零售業嗌晒救命，反水貨活動影響仲係其次，景點新鮮感減褪、購物天堂受唔住港紙跟住美金強勢的衝擊先係主因。

由此推論，假期前突然炒起幾隻本地珠寶零售股，好可能只是回光返照，雖然一五年估值普遍去到單位數，但當假期期間銷售數據出籠，恐怕都好難唔畀大孖沙沽多浸。

古勝