絲絲講場：韓男老總居港愛與恨
自己係香港人，有時反而未必睇得清香港，外國人睇會有另一角度。好似韓企衣戀旗下衣念時裝香港總經理張宰榮（Joseph），佢本身係南韓人，派咗嚟香港年幾，諗唔到佢喺香港至Like嘅嘢，竟然包括大家日日見慣嘅地鐵，同埋未必個個港人都識嘅行山勝地龍脊。
最愛搭地鐵 行「龍脊」
復活節長假期去邊玩？Joseph話去行山，仲介紹絲絲去龍脊，話平時同屋企人同朋友去開。龍脊？喺邊？原來係喺港島石澳。唔講唔知，龍脊畀《時代雜誌》選過做亞洲最佳市區遠足徑。要由只係嚟咗年幾嘅Joseph介紹番畀絲絲知，有啲啲滴汗添。
Joseph未派嚟香港前喺上海做咗十年嘢，所以普通話絕對唔普通，之後公司派佢嚟香港，佢就帶埋屋企人住咗香港年幾。今年係第二次喺香港過復活節假，因為公司有新店開，可能都要工作，惟有行少日山。
佢仲好鍾意香港不夜天，覺得好有活力又潮，又話香港生活好方便，特別係的士同地鐵。又係Like地鐵？絲絲記得，嚟自上海嘅永達汽車（03669）副主席王志高之前又係話好鍾意香港地鐵。
唔Like港樓租貴Size細
Joseph雖則喺上海住咗十年，佢嚟到都一樣覺得香港生活費貴，尤其最唔Like租貴。佢依家租住緊港島老牌屋苑1,000呎單位，租金足足係以前上海大宅嘅3.5倍，但係Size就細咗一半。呢點，絲絲都好明。
兩個囝囝都有跟Joseph一齊嚟香港，兩位公子一位19歲一位17歲，讀緊國際學校，通曉三文三語，除咗母語韓文同英文外，仲識中文。唔知兩位公子有無女朋友呢？Joseph笑笑口話「應該無」。嗱，絲絲隨口問吓咋！
余絲韻