絲絲收到風，招商局國際（00144）董事總經理胡建華升做母公司招商局集團副總裁，佢個MD（董事總經理）位咁點？原來招商局上個月六號喺母公司網頁出咗招聘廣告，仲列出八大要求。呢個唔係一般員工職位，而係MD位，都做公開招聘。
近年國家力推國企市場化，招商局國際身體力行響應，真係不愧為首家喺香港上市嘅紅籌。
尋日招商局國際董事會主席李建紅話，想推動市場化同國際化，唔想再單一由董事會任命人選，所以就公開招聘。
八大要求其中就包括：要有15年以上港航及相關企業工作經驗、5年以上大型集團企業高層管理經驗、仲要熟悉收購兼併、綠地建設等業務開發模式、同埋具有良好嘅戰略眼光與決策能力等。
招聘廣告刊登咗十三日就截咗止，佢哋收到七、八十份申請，第一輪面試都完成埋，預期四月中可以決定合適人選，到時會公布。
想做國企高管仲有機會。李主席話除咗中央任命嘅領導層外，其餘職位都會繼續以公開招聘嚟吸納人才。
原MD胡建華升做母公司副總裁後，仲會繼續負責物流、港口同埋海外業務。
余絲韻