絲絲講場：王冬勝感同身受月光族
尋日滙豐人民幣論壇上，百度搜索首席財務官李昕晢提到，依家每五年就新一代，八十、九十後同老一輩嘅人觀念好唔同，唔少更係月光族。
同場嘅滙豐亞太區行政總裁王冬勝（Peter）即時不知幾認同，話佢幾個細路完全唔介意幫佢使晒啲錢。台上台下當堂會心一笑。絲絲所知，王冬勝位公子，上年啱啱喺美國大學畢業，依家23、24歲左右。
囝囝家教嚴 唔會亂投資
不過佢屋企家教好嚴，聽講即使係18歲成年，都唔可以自由投資。依家阿仔大學畢業，投資可以自己話事喇啩，會唔會直接叫富爸爸教番兩手？自己投資掂，唔使靠「父幹」。
好似Peter咁嘅廿四孝阿爸，香港比比皆是。花旗銀行出咗份調查報告都講到明，香港千萬富豪最關注嘅，係子女嘅教育同謀生，甚至仲着緊過自己退休。今時今日啲樓價咁貴，畀着你做父母，自己可以嘅，點忍心唔出手幫吖。所以要公平啲，咪成日都話啲後生靠「父幹」，佢哋都唔想嘅。
余絲韻