絲絲講場：跟股神搵食你未必敢
股神巴菲特前日聯同3G Capital鯨吞卡夫食品，再次證明股神對飲食板塊情有獨鍾，股神嘅投資組合，未必個個跟到，但佢投資組合入面嘅食品，一日五餐跟足又會點呢……敢唔敢跟？
餐單熱量超晒標
先講早餐，整杯卡夫旗下嘅Maxwell House咖啡，再歎吓卡夫Oscar Mayer煙肉同Tim Hortons冬甩，合共650卡路里。午餐最誇張，Burger King華堡配可口可樂共1,510卡路里。晚餐食卡夫芝士通粉同香腸，配亨氏薯條同茄汁，共920卡路里。加加埋埋，一日三餐盛惠3,080卡路里，仲未計零食添。
本港食安中心就話，18至29.9歲成年人可以攝取嘅最高熱量，男同女分別係2,400同1,900卡路里，好明顯，股神「餐單」超晒標。
現已84歲仲好精靈嘅股神，佢嘅至愛係可口可樂，係真鍾意飲嗰隻；佢阿女Susie仲講過阿爸當薯條同炸薯餅都係蔬菜！咁食法，叫絲絲點跟。
余絲韻