Market Insight：博雅可落鑊短炒

下周一為三月期指結算，港股一副應跌唔跌姿態，昨日早市最多跌129點，相對美股跌得溫和，中段多得A股拗腰倒升，恒指曾倒升64點，收市跌31點報24,497點。睇嚟結算前，港股仲未想咁快結束上落市，A股升H股跌底下，恒生AH溢價指數升到135.72，再創今浪新高，反映兩市掛牌股份，A比H平均高出三成五。

事實上，過去幾年A股大幅拋離H股的情況都出現過兩次，分別係○八年一月及一一年十月，溢價指數分別去到213.4及142，一一年一次源於H股急跌，另外兩次則係A股狂升，H股如老僧入定，所以溢價大幅拉闊。

古勝冇點你

萬里長空

入市態度明顯有別

今浪中國大媽對北大人穩增長措施不遺餘力，顯得信心十足，真金白銀兼借大孖展入市。反而八成交投來自機構投資者主導的港股，依然紋風未動。事關普遍賓架估中國GDP要等到年中之後，要畀兩三季時間減息的效果浮現，增長的拐點先會出現。

近期滬港通北向額度門庭冷清，可見佢哋對跟住大媽去衝浪興趣唔大，兩市本身又做唔到套戥，玩家心態南轅北轍，等兩市差價收窄，可能要一段日子，一係A股炒家對經濟失望，又或者錢多貨少的芬佬，終於忍唔住補倉至得。

今年中國的GDP增長目標訂得7%，乃九十年代以來最低，外圍疲弱加上內部經濟改革，代價係產能嚴重過剩，內需不足，又唔肯行番○九年4萬億人仔亂石投林的舊路，家陣基金要搵有故事支持的中資股難度好高。但凡沾唔上「互聯網+」或者「一帶一路」概念的，其實唔少仲殘過○八年海嘯時。舉個例，航運股中海發展（01138）市帳率0.68倍，仲低過海嘯時期的0.75倍，即使國企股，平均市帳率1.28倍都比○八海嘯的低位1.1倍高得唔多。

科網股輪流被追捧

騰訊（00700）主席馬化騰兩會期間提出「互聯網+」的原形構思，要透過網絡發展點樣為傳統產業增值，到底得唔得，近年積極由線下走到線上的家電零售商國美電器（00493），算是較完整的例子，由最初面對網店如淘寶商城等挑戰，到洗心革面由線下兼戰線上，初期資訊科技開支大增，到開始進入收支平衡期，足足用咗近三年時間。

由國美故事，古勝認為即食炒家不如諗番純虛擬、無包袱由網上起步的公司，好似京東（JD.com）仲乾手淨腳。

近期唔少人搵「互聯網+」故事炒，結果一眾軟件及手遊股見火燒冷灶，輪流被炒起。早排介紹的IGG（08002），早兩日輾轉見4.43元，走勢唔錯。昨日見博雅互動（00434）幾對辦，21球成交升6.9%收6.19元。博雅主攻棋牌類遊戲，如啤牌及鬥地主一類，產品的周期較長。

去年由網上加快移植至手機的進度，手機遊戲收入支持整體收入及純利升38.8%及1.1倍，至9.45億元及2.8億元人仔，16種舊有遊戲外，今年有5種啤牌新遊戲推出，一五年預期市盈率啱啱低於10倍，要返回舊年30倍的瘋狂估值水平，機會應該極微，但以一五年預測32%盈利增長，再睇佢昨日大成交，欲作勢挑戰月初高位6.5元（以收市價計經已破咗位），有短炒一浸的條件。

東風現水平唔怕買

東風集團（00489）周三晚出成績，去年純利128.45億元人民幣，按年升22%，符合大行預測中位數，昨股價升3%收報12.16元。去年東風累計銷售273.35萬輛，按年升6.4%，乘用車及商用車分佔233.91萬輛及39.44萬輛，分別升10.4%及下跌12.2%。集團今年銷售目標為295萬至300萬輛，按年升8至9.6%。雖然同一三年的19%銷售增長比較不可同日而語，如果達標，至少銷售增長會較一四年改善。

業績表現另一關鍵，是入股標緻雪鐵龍的戰略聯盟能否盡快扭虧為盈。一五年PE得6.3倍，比十年平均9.7倍及中位數8.7倍低35%及27.5%，12元左右應有充足safety margin放心揸實。睇番一一年以來，東風高位往往可以去到8.5至9.5倍PE區間，博市況好轉，又唔怕悶可留意吓。

古勝