蔡紅軍喺美銀美林做咗超過17年，負責國企與民企上市融資併購，係間行嘅中國區業務舵手，舊年就有份領導中石化分拆下游175億美元嘅零售項目，項目後期仲得騰訊（00700）等巨企入股。
波拉特做Google大掌櫃
講起華爾街，絲絲醒起號稱華爾街最有權勢嘅女人、大摩財務總監波拉特，啱啱亦宣布五月底跳槽去Google做大掌櫃。
波拉特完全熟晒硅谷科技界，佢九十年代就負責過Priceline、eBay同亞馬遜呢啲上市大刁。
Google近年畀人話大花筒，波拉特上場有望執番正盤數，難怪波拉特跳槽消息一出，Google股價即彈2%啦！
余絲韻