畀人叫得做「沽空機構」嘅，有名你叫，呢啲研究機構專門一邊唱淡隻股一邊沽空，唔少中資股都中招。曾狙擊天合化工（01619）嘅「匿名分析」（Anonymous Analytics）又再出手，今次出報告唱好民企神冠（00829）。你無睇錯，係「唱好」！
「匿名分析」今回唱好早排先畀另一間沽空機構狙擊過嘅神冠，仲話神冠畀人質疑造假係無辜，唔通依家開多瓣，靠埋唱好買貨搵食？
神冠早排先畀另一間沽空機構Emerson Analytics質疑帳目，股價跌過一浸，搞到董事長周亞仙要開口還擊一句「真的假不了」，仲話對方「唔敢見我」。
睇嚟周董事長咁淡定唔係無原因，依家連Emerson嘅行家「匿名分析」都出份報告幫口，仲用咗好多資料嚟證明神冠帳目係「真的假不了」，仲畀埋個3.68元目標價，股份有65%潛在回報咁話。沽空機構竟然唱好上市民企，真係世事無絕對！
周董事長見到份報告唔知點諗？投資者似乎好受落，尋日神冠股價升9%，收市報2.51元。股價畀沽空機構唱到升，絲絲都係第一次見。
「匿名分析」呢次創先河出「唱好」報告，第日再有公司畀沽空機構盯中，唔使騰住，睇清楚份報告唱淡定唱好先喇！
余絲韻