理財Campus：20出頭瞓身為買樓

「我都20幾歲，屋企照顧咗我咁耐，唔通仲要畀屋企人負擔！雖然話就話畀咗家用，但用嘅、食嘅、住嘅都係父母開支，所以我想自力更生，可以減輕佢哋負擔。」Brian語出驚人，23歲就想靠自己買樓。然而，他並不是「得把口」，由大學一年級開始，他兼職做保險經紀，四出搵客賺真銀。四年後的今日，已經成為年薪逾百萬的才俊。

父親為保險公司的高層，希望子承父業，卻沒有直接替兒子拉攏關係。「父親想我早啲獨立，所以起初完全無介紹任何客戶或者朋友畀我。一開始我做得好辛苦，只係靠約3萬元的積蓄及政府學生貸款交學費、宿費及應付生活開支。」

賣保險炒股 身家120萬

初生之犢賣保險，當然從朋友方面入手，首年只簽到3張單，但總算是成功的一步。幸好，之後Brian得到朋友的支持，甚至介紹其父母買保險，客戶就如藤蔓伸展，成功取得突破。他亦主動出席不同的公開活動，參加各大小組織，如成為香港中小企總商會青年委員。父親眼見他工作有熱誠及有點成就，才帶他出席商界名人的晚會，助他擴展生活圈子。

除了累積財富，Brian由大學二年級開始，利用政府的學生貸款投資股票。「我通常都會買藍籌股如港交所（00388）及友邦保險（01299）等，另亦投資南方A50（02822）、安碩A50（02823）等。買股三年間，我贏得了10萬元。」

現快將畢業的他，靠投資及賣保險，身家已逾120萬，成功進身一四年百萬圓桌會會員。

「麵粉價」貴 估樓價續升

雖然年薪過百萬，但他有錢卻沒有時間去使。「一日大概3小時返學、9至12小時工作，餘下就做Project或瞓覺。辛苦就一定辛苦，但我覺得後生都唔辛苦去搵錢，到老的時候先辛苦就會太遲」。他表示，生活最大的開支就是養車、買電子產品，因覺得個人「包裝」好重要，故一年總生活支出達30萬、每月家用1萬，另全年儲蓄逾50萬。

最近，Brian開始密密睇樓，希望年底前可以置業。身家豐厚的他，不愁無錢付首期，但為何要急於這時候高追上車？「依家啲物業，普遍每呎建築成本達7,000元，成交呎價就逾萬元，其實相比建築成本相距不大，所以依家樓價唔算貴，亦相信跌幅不會太大。」

吼大埔700呎村屋上車

他見首期充裕後，故決定趁早上車，主攻大埔區400至500萬、實用面積700呎的村屋，並計劃用100萬當首期供款及裝修等開支，承做九成按揭，供款期30年。「其實本身想睇市區400萬的單位，但實用面積只有300呎，加上家住大埔村屋，附近村屋實用呎價見近6,000元，較為划算。」

然而，保險經紀收入不穩定，供樓又是否沒有問題呢？「我讀緊書已經有年薪逾百萬元，隨通脹增長及客源增多，朋友買的保險保額亦會加大，我相信三年後，年薪可達200萬。即使今年上車，每月供款約1.6萬元，負擔也不算大。」

「置業，其實係好開心的事。即使經濟發展不好，至少有瓦遮頭，少咗一樣嘢擔憂。住屋是必需品，而且可以樓換樓，並不是樓奴！」Brian將繼續尋找理想單位，勢要靠個人努力進身有樓階層。

專家：村屋難按九成

康宏理財助理聯席董事盧艷萍表示，90後急於上車是可理解，惟買樓前須先考慮面對的加息風險，衡量將來的供款能力。

她表示，Brian計劃購買村屋及做九成按揭，惟村屋未必能做到九成。再者，Brian從事保險業，依靠佣金作收入，故入息浮動，銀行按揭或不能借足九成。另外，Brian用100萬作為物業開支，只餘下逾20萬積蓄，他應考慮是否能應付日後的資金需要。

經濟好宜買股博升值

盧艷萍認為，年輕人不用急於一畢業就「上車」，除非買樓是個人夢想，為實現夢想難以用金錢衡量。否則，市場尚有不同的投資產品，若果將來踏入加息周期，經濟轉好的話，股票、基金等投資產品均有升值潛力，未必需要靠買樓為資產增值。