Market Insight：領匯收購壯大規模

周初聯儲局副主席費希爾打晒開口牌話未來美國好難持續加息步伐，亦提到以往聯儲局試過太早加息令經濟轉差，認為近期強美元會中和部分寬鬆貨幣政策的效果，壓抑通脹，似乎為局內的鴿派講說話。自一二年開始，年年都估美國加息，狼來了故事講多都開始無咁多人信。

君可見，早排美國議息，十年期美國國債孳息率級級落，隔晚撻落1.87厘，同月初高位2.26厘愈走愈遠，反映金融市場認定美息加極有個譜，三十年債息依家得2.46厘，有趨勢向住年初低位2.22厘進發。

睇番一四年初足足4厘的水平起步，加息周期將至避開長年期定息投資的傳統智慧錯鬼晒！本來美國經濟復甦還過得去，但歐日央行狂印錢，熱錢狂湧向美元資產，美金大幅升值，又拖番美國經濟後腿，講到底，全球經濟一體化，問題亦都共同承擔，累鬥累的惡性循環已經形成。

古勝冇點你

萬里長空

大媽炒股攻勢過猛

前日A股萬四億元人仔交投，最後升得3點，十連升已有點勉強，監管機構苦口婆心勸魚缸大媽千萬唔好賣樓炒股，多少話畀你知內地股市癲到乜程度。昨日滬綜指跌30點收報3,660點，話轉勢是言之尚早，但透過融資推動升市，到底可維持幾耐？真係要睇北大人點諗。

大媽們智慧認定中國要穩增長，點都唔可以畀樓市、股市死，要繼續依循財富效應推動內需及經濟復甦。事實上，中國股市一直都離唔開一放就亂，一收就死的兩極化形態。前日恒生AH溢價指數顯示，A股貴H股三成六，是三年多高位，就算H股玩家真係做到坐懷不亂，完全唔理A股狂態走去炒落後，掉番轉頭睇，就算A股短期高位調整，H股亦無必要跟到足也。

趁低息期未有耐講拜拜，領匯（00823）出去搵嘢買，今次收購跨境進行，由南豐手上買入北京中關村的歐美匯購物中心（EC Mall），作價25億元人仔，相當於31.2億港元。

息率有一定吸引力

中關村被譽為中國硅谷，相關購物中心毗鄰有不少高科技公司辦事處及高級學府，出租率為99%，目標客戶係白領及大學生等高消費中產，今明兩年商場有大約三分之一租約到期。不過，近一年內地零售市道麻麻，整體購物商場租金升幅已經大幅放緩，恐怕項目未必做到過去兩年，平均每年加租一成五的光景。

該商場於○九年落成，項目短期應該唔使太花錢去做提升工程，除稅後的淨回報大約4厘，如果短期無太大空間做提升及加租，對大部分房地產信託基金嚟講，收購未必對營收有幫助，問題係領匯貴為城中估值最高的REITs龍頭，咁又唔同講法，加埋進身藍籌之後，領匯本身融資成本確係比其他行家便宜，最近發隻七年債只係3.2厘，借3.2厘買4厘，意味今次可以做到即買即賺到息差，對每單位派送（DPU）有輕微的好處。

內地個人遊消費同人數都無驚喜，今年香港商舖租金壓力漸見，尚幸領匯的屋邨商場所受影響較輕微，現價48元，預期一五年派息3.77厘，如果美債息繼續停留在1.8厘甚至更低，有2厘息差的領匯諗得過。

瑞聲調整料未完成

業績期真係睇到頭都大，上市後首份倒退成績表的瑞聲科技（02018），股價一隊就一成，收報48.2元，去年純利跌10%至23.18億元人仔，撇除一次項目，實際經常性盈利有2.8%增長，惟以一隻18.5倍PE的高估值工業股，單位數增長市場唔多接受之外，毛利率回落都係一大礙眼之處。年初炒iPhone 6帶起第四季業績，由40元起步升咗唔少，昨日低位45.55元雖然有唔錯支持，守得住靜番兩三個月至諗未遲。

收市後，中銀香港（02388）公布去年純利245.77億元，升10.4%，啱啱高過街外預測236億至252億元的中位數些少，每股盈利2.3246元，派末期息0.575元。

豬肉佬萬洲國際（00288）去年虧轉盈賺7.66億美元，稍低於市場預測中位數8.18億美元，但上市後弱過藥煲表現，加埋被賓架股東挾上市離場的因素，雖然公司賣豬，嗒落卻有雞肋味道。

古勝