孖妹S檔案：談上車體驗 財女比財技

22歲上車 醞釀第二擊

余：美聯金融高級副總裁 余淑穎（Suki）

彩兒：你21、22歲已經成功上車，唔通你嘅成功係靠「父」幹？

余：做人梗係靠自己！我剛畢業係喺日本公司做文職，負責對海外客戶，飛日本同東南亞當食生菜，但係Stay埋晒啲郊區，忙到一個月見得一、兩次父母咋，所以完全無時間使錢，當時月薪兩萬蚊，我都儲到一半錢，加上前男友一齊儲，年半就餵飽豬仔錢罌上到車，喺○一年以180萬，做九成按揭買入元朗一個近千呎單位，邊似依家後生仔女要4年唔食唔使先可以儲到首期吖！我哋因為分手所以喺○七年以約250萬沽出單位，好在分手唔係遇上跌市咋，不然就人財兩失喇！

不過，依家要我上車真係制唔過，諗番以前供樓真係好大壓力，而且住得遠，交通費貴，頭兩年只可帶飯返工，完全犧牲Living Style，我唔會畀呢啲悲劇重演。現時我租住九龍灣大型屋苑嘅建築面積500餘呎單位，租咗5年只加咗20%租金，平過供同類單位，所以依家仲有時間畀我儲錢買Dream House──九龍塘大型屋苑單位，我寧願儲大筆首期先，唔會做樓奴，依家就用輕鬆心態靜候啱心水嘅單位。

余淑穎專揀波幅低但增長潛力高的基金。（潘國禮攝）	梁傲霜的資產組合預留兩成現金，以備市況調整時撈貨。（何頴賢攝）	黃思敏表示，她個人專揀龍頭股及穩健的板塊。（朱晉呈攝）

基金穩勝 押注醫療股

Kitty：你心頭都幾高，九龍塘屋苑單位郁啲都過千萬，點儲呢筆巨款？

余：我投資取態傾向穩中求勝，唔會買個別股票，以基金為主，專揀波幅低，但增長潛力較高嘅基金，大市升30%，佢要升25%；但大市跌30%，佢只可跌5至10%。

今年係美國嘅選舉年，相信總統奧巴馬會保持當地經濟穩定，我依舊睇好當地市場，所以美國股票基金佔我整體投資組合八成，其中以醫療類別為主，有疾病出現時佢可做藥品，平時又可做營養補充劑，所以需求穩定。投資組合餘下兩成資金我會投資喺升值潛力強嘅Hot Item，上年年中起就揀咗印度股票基金，主因欣賞總理的管治，新興市場對原油需求大，現油價低迷，印度政府補貼支出得以下降，再者，當地通脹趨平穩，值得博一博。

年尾股市不明朗因素特別多，所以多數我十一月就會收工抖吓氣，另外，我不時會將紅利投資抗通脹的債券基金，一旦本金出事時，都可以做Cushion嘛。

藍籌賺完 炒樓兼買舖

梁：興證（香港）證券經紀客戶投資組助理副總裁 梁傲霜（Roni）

Kitty：你九八年初畢業人工得五千幾蚊，究竟你點擺脫月光族嘅宿命？

梁：當時我喺一間發展商協助管理地產項目，期間我有做Part-time，又一路進修，所以人工好快就升逾一萬蚊，嗰陣公司有包膳食，唔似依家喺中環閒閒地都要70蚊餐，我又唔會追智能手機，有得用就得，更加禁絕自己買名牌，就連去旅行都只可去東南亞地區。你諗吓，如果每月用3,000蚊買奢侈品，一年就大嗱嗱無咗3萬幾蚊！

我堅持做慳妹，每月儲起一半人工，其後正因唔熟股票投資，所以專吼滙控（00005）及長和（00001，前稱長實）等穩健股份，每隻都賺逾兩成先沽，不過依家就今時唔同往日啦！最終我喺○七年以218萬買入銅鑼灣一個舊樓單位，持貨兩年，賺逾140萬元，其後就同朋友合資投資太子地舖同九龍東嘅工貿大廈。

慳妹用技術分析揀股

彩兒：你○九年開始做股票經紀，同時又有地產代理牌，咁咪可以玩盡股票同物業市場？

梁：我目前嘅資產組合有約六成放喺物業，兩成放喺股票，另有兩成係現金，預留以備市況調整時撈貨，舊年組合回報超過四成。

自滬港通開通之後，一路有留意A股，今年初正式入市搵北水，現時股票投資係A股及港股各半，我主力用技術分析揀A股，若股份橫行已久，突然出現大成交、破位10至15%，便會考慮入市，同時當然會留意阿爺口風，有國策支持好重要，我都會特別留意公司管理層持貨量，一般少於20%，我都唔會揀。入市後就會分段止賺，如果唔好彩遇見大陰燭同突發市況波動，我都會果斷止蝕。

其實我依家都心郁郁想再買住宅物業，首選係土瓜灣，旨在有港鐵同收購重建概念；另外地下連花園嘅村屋都係好選擇，貪佢可以慳番每月2,000至3,000蚊停車場租金。

吼半山盤 等動盪入市

黃：獨立股評人 黃思敏（Jess）

彩兒：依家後生仔女嘅格言係「先買樓後結婚，不買樓不結婚」，你會唔會都有股置業欲？

黃：結婚唔一定要買樓，最緊要開心同睇吓自己有無需要。我○四年試過搬出去住，搬咗幾次都無離開過中環區，事關每個單位都可以行路返工，○八年曾經有諗過買入當時租住、位於堅道實用面積約400呎單位，業主開價200萬，但轉個頭已被人搶購，之後又睇過跑馬地幾個盤，但考慮期間樓價已升到砰砰聲，所以一路都無入市。

目前嘅心水係港島東半山靜中帶旺嘅樓盤，不過現時性價比太低！依家我同家人住喺灣仔，都唔諗住結婚，所以無需要趕上車，但會一路滾大手上嘅首期，等市場動盪時先入市。

宅女分段吸A股ETF

Kitty：女仔扮靚都使唔少錢，你又會點投資自己？

黃：好彩我係一名宅女，有確實需要先會出街買嘢，女仔買衫實有「連鎖效應」，買衫可能又要襯個手袋，所以每次畀錢前都要諗過度過先，最好買長興款。每個女仔都想做「財女」，重點係要將投資變成習慣，簡單就是美，唔使玩咁多花款。首先要設長、中、短線，千祈唔好抱住「一日唔沽唔算輸」嘅心態，一定要落實執行止蝕，個人會專揀龍頭股同穩健嘅板塊。

內地A股股市自舊年底彈起，估值比其他股市為平，加上市場預期人行今年仲會減息，所以我會每逢股市調整，分段低吸A股ETF，好似南方A50（02822）同華夏滬深三百（03188），而內銀同騰訊（00700）都係我愛股之一，目前港股同A股基金分別各自佔資產組合20%。

Kitty、彩兒

若有料報畀彩兒同Kitty或有嘢問，可電郵money.biz@opg.com.hk