Market Insight:內房股有炒作條件

在生物科技股帶動下,上星期五晚,納指重上五千點關口,對上一次企在五千樓上,已是十五年前科網熱時創出的紀錄。聯儲局在議息聲明收起「耐心」字眼後,美股仍然急升,一來不明朗因素消除咗,其次言詞間仲係充滿鴿味,意味仲未百分百肯定六月就會啟動加息。

議息後,對加息殺到埋身的炒作暫告一段落,拆倉潮唔單止令十年美債息不升反跌,回到1.93厘,較月初的2.26厘明顯回落,最誇張係美匯指數,議息後一度由近百邊緣殺到落去94.76,足足跌超過五巴仙,美元好友被冚到暈得一陣陣,金價油價都顯著反彈。

港股方面,聯儲局短期內立即啟動加息的可能性大減,息口敏感股炒完一輪,之後輪到剛出業績的指數巨無霸騰訊(00700)接力炒上,整周恒指累積升552點或者2.3%,收報24,375點,觀乎上周預託證券計算出的指數升幅,今日港股早市極大機會返到24,500點附近開出。

近期A股愈走愈強,滬綜指已經連升多日,牛到爆燈,兩市成交額再次突破萬億元人仔,主要係人行繼續逆回購,變相放水,減低A股大媽對中央短期再有冷卻股市活動的憂慮,又開始炒緊兩會後其他穩增長政策出台。

A股去向睇法不一

不過,本地搵食的基金大戶似乎唔多信A股可以癲好耐,近期恒生AH股溢價指數由120升番上132.8水平, 已差不多返到去今年一月中高位134.5,A股狂升H股慢升下,A股已經貴H股三成三。內地券商唱到行,短期滬綜指睇四千點,今次大媽與基金經理邊個睇啱市,相信好快有答案。

至於話會唔會因為A股狂升帶起番H股,由大行做的基金經理調查報告顯示,大部分有水浸情況所見,這個可能性不能抹殺,且看今次港股可唔可以趁機會解決多年與兩萬五點阻力糾纏不清的關係。

一旦基金經理要急急解決手上現金過多的問題,可以預期交易深度夠的大市值國企,會較先得益。在國企重組及一帶一路概念下,電訊、石油、鐵路、基建及建築股都可以睇高一線,短期值得優先考慮。

對樓市由壓抑到托市不遺餘力,中央態度一百八十度轉變,理論上,政府唔畀樓市死,減息或多或少紓緩了這個高財務桿槓行業的利息成本壓力,內房股理應可以有驚無險咁度過今個周期,唯獨今次情況同○九年不大一樣,內房企業面對市場環境較以前複雜,例如三、四線城市落成量遠超過市場需求,引發價格戰線漫長,並非阿爺兩三句說話可以解決。

去槓桿勢成大趨勢

另一點,是當人民幣唔係必然兌美元升值。以往上市內房企業透過發美元債集資,息口隨時去到10厘甚至15厘,主理人計過度過,人民幣升值令債務變相貶值,最後都係除笨有精。

不過,今時唔同往日,依家手頭上已發行的美元債,隨時因為人民幣貶值,引致每年要為債券重估,隨時為業績帶來匯兌損失,故去年十一月人行減息至今,內房股表現比預期遜色,強如兩隻藍籌內房中海(00688)及華潤置地(01109),若然是在人行十一月減息後第一個星期一裂口開高後追入,揸到今日分別輸2.6%及賺8.2%,再睇其他內房,都有類似贏輸參半情況,就算贏,都係有限數,同減息內房必升的傳統想法在有些少出入。

上星期,富力地產(02777)跌至五十二周低,皆因上市以來首次業績唔派息,更弊嘅係,去槓桿會係今年內房股的一大趨勢。

憧憬鬆綁措施出台

兩會對樓市着墨不多,市場預期中央樓市政策今年都唔會有太大調整,反而鬆綁房貸及放鬆限購措施,預期會在各地方陸續出台。或者因為樓市托極唔起,最近內地媒體吹風,部分一線城市為鼓勵改善性住房需求,支持二套房貸,正研究減低稅費的措施,看來在保增長的大前提下,中央不能不讓內地樓市升溫,以推動財富效應支持經濟。

考慮減息以來升得唔多,無論由貪平出發,抑或純炒政策出台,在下認為內房股都應該有得諗吓,好似雅居樂(03383)上周突見異動,看官可以留意,另外在下心水仲有世茂房地產(00813)、保利置業(00119)以及碧桂園(02007)。

古勝