80後情侶：唔靠屋企上車

發掘屯門350萬元盤

已經畢業八年的Linda，現職測量師，與男友都有穩定工作，並準備兩年內拉埋天窗，近一個月四出睇樓，為將來的愛巢做定功課。相比不少仍然迷惘的八十後，Linda與男朋友的上車路線相當清晰，為了將貨就價，他們一開始就有共識要搵屯門樓，Budget亦定於350萬元的兩房戶。

三年前開始儲錢上車

為了達到至少一成的首期目標，兩口子於三年前已開始儲錢。Linda笑言，自己同男朋友儲錢方法，亦與本報的八十後夫婦上車血淚史相近。

不過，他們的拍拖活動並非流連各大公園，而是行山做運動，亦減少出街睇戲次數，「即使去旅行都是去短Trip」，儲蓄之道在於一個「慳」字，現時二人每月儲逾兩萬元。

他們二人昨日連睇十多個單位，由市中心至區內二線屋苑都有，而且Linda全程做足筆記，無論面積、間隔、坐向，以至內籠都記錄在案，惟最後未有入市，「雖然好多單位都Out budget，但自己會留意市道，如果叫價跌番就會考慮」。

祥益黃振文稱，雖然政府早前加辣，但由於屯門區仍然不乏樓價400萬元以下的盤源，未見上車客比例減少。但不少換樓及投資客態度轉趨觀望，令本月區內二手交投按月減少三成。