中國人對白事好避忌，內地殯葬商福壽園（01448）ＣＥＯ王計生亦同絲絲講，行業令人覺得太負面，一講到葬禮大家都匿埋。佢話生命終結係人生過程，「要想明白」就唔驚啦，去掃墓其實係去懷念吓親人。
見王總咁開通，絲絲膽粗粗問句，王總有冇幫自己買定位？王總笑笑口話未，佢話內地人唔興幫自己買，因為按內地法例，係冇得「預售」。不過，佢就話公司都有員工優惠！原來係當員工嘅直系親屬過身，幫襯番自己公司有優惠。
在商言商，王總睇好後市，事關內地每年大概有一千萬人逝世。王總話打算發展「白事文化消費」，包括幫先人搞大型悼念活動、出書、出ＣＤ、出埋微電影都得，佢仲話毛利幾高添！佢哋又打算將墓園打造成為人文主題公園添。公司仲諗住要進軍香港，據講五月就會同政府傾。
余絲韻