一舖難求當然造就唔少流言，聽講有代理為求促成買賣，放風話業主想放售地舖，令租客卻步，搞到業主更加難租得出，持貨能力差啲就好容易心郁，弄假成真放售手上靚舖。絲絲收到風，永隆銀行嘅銅鑼灣波斯富街同渣甸街兩間地舖，近排都「中箭」，畀人放風話會賣舖。
企硬唔賣靚舖
永隆想賣「祖業」？絲絲即刻向佢哋助理總經理鍾少權（Derek）了解吓，佢一聽到，就講到明無咁嘅事，佢哋完全無意出售銅鑼灣兩間地舖，只因為之前優化分行網絡，唔夠位整靚個「紅區」去發展財富管理生意，所以先搬舖，原本嘅自置舊舖就打算出租。雖然一直收到好多投資者想買，但永隆真係唔會賣，仲話銀行有足夠持貨能力添。
余絲韻