Market Insight：安踏增長空間大

美息即將由超鬆寬回歸正常化，唔同人當然有唔同演繹，有人認為以近半世紀的紀錄，美國長期利率要返回大約4厘先算合理。不過，好似古勝一類長期睇利率升唔到太多的債券好友，深信喺全球產能過剩、低通脹影響下，即使息口脫離零水平，要加亦好難加得多，尤其依家全世界都行零息政策，任何一個國家經濟復甦，利率有條件回升，會吸引全球熱錢湧入，最後高匯價又會窒礙經濟增長，漸漸形成惡性循環 。

值得留意，聯儲局委員的年終息口預測，去年九月估緊1.375厘，十二月下調至1.125厘，今次預測進一步回落0.625厘，六個月之內預測唔見咗近半，期間仲要失業率由5.9%落到5.5%，創海嘯後新低。

古勝冇點你

萬里長空

恒指未脫上落格局

正如之前所講，今次美國就業市場復甦有量無質，實質工資增長呆滯，遠遠不及海嘯前。在外，強美元使美國跨國企業營收壓力增加；在內，加息預期去年開始已令美國樓市放緩，建屋量大減，表面風光的經濟，實在未必可承受到利率回到歷史平均水平。

連日唔肯跟A股升的港股，藉美息明朗化而出現報復式反彈。其實周三大市成交已明顯回升，可見唔少醒目錢早一日部署。昨日恒指開高205點後，之後全日高位徘徊，收市升348點報24,468點。騰訊（00700）業績本來只及預期中下限，但有句說話：「買股票憧憬的係未來唔係過去」，昨日所見，一眾大行報告對騰訊透過微眾銀行的金融服務發展都樂觀到極，投資建議清一色嗌買，造就股價單日大升6.7%，收報145元。

單係騰訊一隻股票貢獻恒指152點，等同成個市點數升幅四成幾。講開又講，匯友資本（08088）昨晚出通告話知悉有報道指公司同騰訊商討業務合作，難怪近日股價由低位累升四成有多，不過，趁好消息出貨亦係常理。

話說回頭，話個市好叻咩，其實又唔係，至少個市連抽兩日，恒指連人行二月底減息之後高位25,101點，都仲差600幾點先返到家鄉，更甚是同期A股一升絕塵，港股實際仲未打破拉牛上樹的大型上落市格局。技術走勢上，大市一日唔見大成交升穿25,000點企穩，都不宜太早判斷單邊升市已經出現。

高息股置富較吸引

美息升唔得去邊，隔晚美國十期期債息已經撻番落去1.95厘水平，月初2.26厘可能係短期見咗項，利率敏感的地產股及收租股昨做好，九倉（00004）、希慎（00014）及新地（00016）升幅較標青。轉名後第二個交易日的長和（00001）再升0.5%收報152.4元。

純綷以息誘投資者的REITs，領匯（00823）一口氣升5.1%收49元，股價由二月高位回落一成三的一次修正，估計一五年每單位派息1.81元，息率3.69厘，與十年期美債息差唔夠2厘，現水平合理惟不能奢求再升太多，想搵定息回報，或者可以諗諗一五年息率估計有5.3厘的置富產託（00778），尤其長和系世紀重組後，相信未來有更多購買資產機會。

今趟業績期見無乜特別醒神股票，昨日提到汽車股中吉汽（00175）及長汽（02333）是罕有的異數，都係因為舊年超差，一五年業績至可以肯定有增長，基金無故事好炒，雖見升咗唔少都惟有照追落去。再數，內地體育用品股經過幾年清理庫存，縮減分店的大型體育用品企業，個別都有增長古仔可以捧吓。

電子商貿收入浮現

好似安踏體育（02020）過去幾年逆境之中，佔有率不跌反升，現時庫存清理周期完結，相信會有較大增長空間。去年在大部分體育用品公司僅有輕微復甦下，安踏收入及純利分別升22%及29%，超過市場預期，主因毛利較高的童裝系列及電子商貿收入開始浮現，FILA品牌的貢獻也都比預期多。

隨着NBA重點開拓大中華市場，並與安踏合作推聯營品牌，會係一五年業績增長動力來源，而平均售價較高關係，預計可交出高於安踏本身產品的毛利率，推動整體綜合毛利繼續改善。一五年16.5倍的預測市盈率，稍高於歷史平均的16倍，現價合理，作為分段入市目標，現水平先買一定比例並無不可，更理想當然是把握市場氣氛較差時入手，股價跌落15元左右再加注。

古勝