孖妹S檔案：深港直擊 再炒通車精挑贏家股
內地資金借道滬港通，令今個月初兩隻「光伏孖寶」輪住炒起。適逢「阿爺」開大喇叭預告深港通有望下半年推出，孖妹今趟要行快人一步，梗係即時四出打聽投資機遇啦！我哋仲搵齊深、港兩地嘅券商同股友，齊齊「腦震盪」發掘新一輪潛力爆升股。勢估唔到，深圳之行，竟然畀孖妹意外發掘到一名身家過億，要坐VIP房嘅內地富貴股友添！
券商篇：滬深港成新經濟體系
徐：齊魯國際控股首席策略總監徐燦傑
Kitty：滬港通「雷聲大，雨點小」，唔少券商當時投資咗幾十萬都未有回本，依家又要開始準備深港通，頂得住無？
徐：我預咗滬港通最少一年先開始運作成熟，依家有投資A股嘅客戶唔夠兩成，希望佔比將來可以增至30%以上啦。雖然滬港通反應無預期熾熱，但深港通一定要做，因為滬深港三地市場將成為「中港金鐘罩」新經濟體系。我估計只需將現有系統進一步升級就可以實行深港通，所以今次成本應該少啲。
彩兒：你成日到內地出席講座，又要研究A股，工作量一定比以前大啦？
徐：係呀，依家一個月要留喺內地工作兩星期，因為兩地市場資訊唔對稱，要喺投資者教育做多啲工夫，促進兩地資訊融合。
格力業績穩兼估值平
胡：長江証券深圳營業部投資顧問胡小鋒
Kitty：深圳同香港咁近，深圳居民已可直接到港開戶，咁咪削弱咗滬港通同深港通嘅威力囉？
胡：本分行目前通過滬港通買港股嘅客戶有近一成，主要係深圳以外嘅內地居民。滬港通至今雖然無咩驚喜，但我哋都支持推出深港通，推動中港市場進一步互聯互通。有咗之前嘅經驗，預計券商同投資者會更快掌握深港通規則同操作，加上深圳鄰近香港，兩地市場結構又有差異，相信客戶會願意分散資金投資港股。
彩兒：港人對深股唔熟悉，有無好推介？
胡：券商及家電行業目前估值合理，其中，格力電器（000651.SZ）係家電行業龍頭，業績穩健，估值為10倍以下，相信會受香港機構投資者歡迎。
浙江世寶H股炒折讓
藺：智易東方證券行政總裁藺常念
Kitty：首批73家合資格滬港通券商無你哋份喎，點解唔參與？
藺：到目前為止，都無客戶查詢過A股，公司亦無做過任何A股交易，證明有興趣買A股嘅客好少。我哋怕投資後收唔番成本，所以只係搵合資格券商合作，計劃日後深港通都係用呢個模式參與。
彩兒：滬港通令市場大失所望，你對深港通仲有無期望？
藺：深圳投資者熟悉香港市場多啲，相信深港通會比滬港通成功，吸引更多資金南下。你見隻漢能薄膜發電（00566）之前升得咁勁，就知內地股民幾鍾意炒股啦，邊有人會買滙控（00005）吖！
另外，浙江世寶（01057）同東北電氣（00042）嘅H股都比深圳上市嘅A股折讓大，有機會受惠差價收窄，香港股友可以留意。
投資者篇：冷門股黑貓中核博升
張：深圳散戶張先生
Kitty：滬港通「北熱南冷」，北向資金流入A股，咁A股最近有無變得波濤洶湧？
張：唔係好覺喎。海外資金多數對金融股有興趣，令內銀股大漲，不過對我就無咩影響，我哋淨係鍾意買中小市值同創業板股份。港股通設定50萬人民幣門檻，所以我唔夠錢入場買港股。
如果日後放寬門檻，我會揀有AH差價嘅國策股嚟買，例如中國北車（06199）H股，股價比A股平幾蚊o架！
彩兒：黑貓股份（002068.SZ）、中核科技（000777.SZ），仲有蘭石重裝（603169.SH）。你買嘅股份果然比較冷門。
大戶睇好深港科技股
盧：深圳大戶盧先生
Kitty：你坐得喺VIP房炒股，身家一定豐厚，咁你覺得深港通一開通，內地大戶會炒啲乜？上次滬港通通車就炒紅咗漢能，今次你哋又會炒乜？
盧：我廿幾年前已經買港股，全職炒股15年，我覺得傳統藍籌股無咩投資價值，依家全球經濟周期差，影響藍籌股表現，只有投資創新科技股先會有增長，例如騰訊（00700），喺佢10幾蚊時我已經買入。不過香港都仲有好股嘅，例如光啟科學（00439），業務涉及大量高新技術，相信公司將來市值有機會超過騰訊或微軟公司，係未來嘅騰訊。
其實深圳科技創新領域亦發展迅速，德賽電池（000049.SZ）、比亞迪（002594.SZ）、科陸電子（002121.SZ）等「小龍頭」我都睇好。正如漢能薄膜剛上市時，都無咩人留意啦。
彩兒：你買股票嘅資金額已經滾到5,000萬人民幣咁多，仲有市值幾千萬物業添，買咩股都得啦。可惜唔係個個都好似你咁財力雄厚。
盧：我已經可以買全球股票，曾經買過美國蘋果公司（美股：AAPL），所以滬港通、深港通對我而言用處不大。我身邊有朋友通過滬港通買港股，但佢哋話限制太多，好唔方便。
專攻內險內銀指數股
林：香港散戶林太
Kitty： 聽講去年滬港通通車後，你靠中國人壽（02628）同浙江世寶食咗好多轉胡。咁深港通概念股你又有咩心水？
林：最初見買A股免佣，諗住小注買嚟玩吓，博AH差價收窄。點知國壽愈升愈有，帶挈我賺咗四成左右。不過，到今年一月中已經無玩呢隻。浙江世寶都放咗啦，依家吼緊低位，等佢跌落10天平均線先再買入。
彩兒：深港通股份名單可能會包括內地股民熱炒嘅創業板股份。你有無打算炒埋一份？
林：梗係唔會啦，太危險喇！深港通通車之後，只會考慮買少少深股，始終都係上海市場大啲，同埋滬股自己熟悉啲，會買行業穩陣嘅指數成分股，例如內險同內銀。
專家股友嚴選港深股份：港股
浙江世寶（01057）、東北電氣（00042）、光啟科學（00439）、中國北車（06199）
深股
格力電器（000651.SZ）、德賽電池（000049.SZ）、比亞迪（002594.SZ）、科陸電子（002121.SZ）
Kitty、彩兒
若有料報畀彩兒同Kitty或有嘢問，可電郵money.biz@opg.com.hk