Market Insight：聯想空軍隨時被挾

不過，睇大環境，三次QE，二月美國失業率回到5.5%，是金融海嘯爆發以來後新低，亦足足比前聯儲局主席伯南克，定出去到6.5%最後無執行的退市指標低一個百分點。

過去大半年，國際油價大瀉，汽油及天然氣等主要開支減少，照道理美國可支配收入增加，無理由消費開支裹足不前，若唔係聯儲局半年內退市共識，加埋美元突轉強，民眾對經濟放緩預期作怪，除此之外，搵唔到其他理由解釋點解美國個個勒住荷包做人。

上周五道指及標普指數分別跌145點及12點，計落一五年至今，兩個指數都經已倒跌。今個星期聯儲局點處理市場對息口預期，又唔引起金融市場動盪，耶倫上任咁耐，今次都應該係考牌之作。

古勝冇點你

萬里長空

芬佬傾向少做少錯

近排港股表現之差，相信令唔少人大跌眼鏡，尤其人行在春節假期一完，出其不意宣布三個月內第二次減息，港股反高潮，高開後低走，之後仲連跌七日，上周四、五終有反彈，但兩日加埋僅升104點，成交仲愈玩愈縮，基金經理都擺出一幅睇唔通，不如少做少錯的姿態。

事實上，人行水已經放咗，連農曆新年假期影響，傳統上內地銀行貸款生意比較平淡的二月，新增貸款都去到過萬億元人仔，遠遠超出市場預期的7,500億元人仔，人行放水已經不遺餘力，依家只能睇睇實體經濟，好似內地消費及製造業未來幾個月會唔會開始有起色，但短期兩會概念已經炒完，期間中央穩增長口號都講到口水都乾，個市短期無乜故事落鑊，估計好大機會又跌入22,500至25,000點的大型上落市泥沼之中。

內銀壞帳風險紓緩

上周地方債務問題終於有所進展，國務院批准地方債置換，規模1萬億元人仔，規模大約等於一五年到期政地方政府債券規模的五成四。自從內地樓市吹起冷風，依賴賣地收入的地方政府面臨財政緊絀問題，通過債券置換借新還舊，高息換低息，確實可以為地方政府財政爭取一啲時間，減低償債壓力。

對於內銀而言，措施有辣有唔辣，好處當然係減低手上債券違約，變成不良貸款的風險，但同一時間，高息置換低息新債，對利息收入不利。姑勿論如何，內銀股股價正面的回饋，可見投資者目前對內地經濟硬着陸，銀行壞帳飆升的憂慮，是高於對息差收窄的擔心。

中國個人電腦（PC）一哥聯想集團（00992），真係屋漏兼逢連夜雨，主席減持外，上星期IDC調低今年全球電腦出貨量預測，聯想慘遭空軍狂轟，過去一星期股價跌超過一成，收報10.94元。

PC乃明日黃花並唔係秘密，去年第四季全球出貨量反彈，皆因微軟唔要支持古董作業系統XP，一些商業用戶焗住升級所致。早前Intel在第四季業績時，對首季出貨表現一百八十度轉向，調低預測，其實對PC行業早就淋咗一大盆冷水。

兩大收購左右業績

早排IDC對今年平板電腦出貨量，增長同過去幾年比較都大幅放緩，聯想的智能移動設備項目包括智能電話，今年受到其他內地生產商大升的出貨量，面對價格競爭會更大，而早於兩三年前見頂的PC出貨量，純綷是淡友搵藉口，基本因素，兩宗收購，即IBM伺服器及摩托羅拉的後續表現，對未來業績好壞先至係關鍵。

上周五，聯想沽空去到4,097萬股，佔成交四成九之多，淡友做緊乜，已是畫公仔畫出腸，睇淡者死心不息做佢世界。唔知大家有冇留意，呢隻基金股成日係好淡對決戰場，一月底、二月初試過連日高沽空後，只係藉普普通通的第三季業績，挾過一輪空倉，淡友由10元補到氣咳，股價上番12元。

古勝先利申，中長線對聯想都有保留，俗語話爛船都有三斤釘，更何況已躋身PC界一哥的聯想，如果沽空比持續高企並隊到落10.5元或更低，小心又會嚟一次挾淡。

古勝