近年積金局積極喺大專學界宣揚強積金理念，增強年輕人對強積金制度、強積金投資管理嘅認識。無他嘅，呢班大學生將來投身社會，自然就要供強積金啦！之不過，科技進步，今時今日要宣揚強積金，確實要交波俾啲年輕人，用吓時下流行嘅社交網站，圖片分享App嚟搞搞新意。
好似家陣積金局舉辦緊嘅「積金Social Media創奇謀」市場策劃大賽，就讓大專生發揮佢哋嘅創意同市場策劃技巧，透過網上社交平台，宣揚強積金訊息。
第一項任務由參賽隊伍策劃一個校園活動同建立facebook（fb）專頁已經完成，但嚟緊三月同四月，參賽者仲要分別利用社交媒體作推廣宣傳、同埋製作一段強積金宣傳短片。暫時鹿死誰手未知，但見到15隊大專生都整好咗美輪美奐嘅fb專頁（部分仲有Instagram），就知戰況有幾激烈。事關，終極大獎除可拎到15,000元獎學金，今年暑假仲可到積金局實習，可謂機會難逢。
至於積金局，佢哋本身都有fb專頁，而「滾續達人」fb專頁唔經唔覺更已經4歲，今月仲舉行咗4周年有獎遊戲添，睇嚟參賽者都可偷吓師喎。
余絲韻