呢個星期，全球最矚目嘅IT新聞自然係周一舉行嘅蘋果公司（Apple Inc.）今年新產品發布會啦，當中視為蘋果新一件劃時代產品嘅Apple Watch，終於鐵定下個月十日預售，二十四日開售，到其時，包括中國大陸和香港在內嘅首發地區，隨時又會掀起搶購熱潮。
之不過，已有人公開表明，唔會買Apple Watch咁話！係邊個？咪就係一早已講過對Apple Watch無興趣嘅全球首富、微軟創辦人蓋茨囉！外媒報道，對於Apple Watch，蓋茨還是嗰一句「不會購買。」而蓋茨妻子梅琳達更加強調，佢哋家族不會買蘋果公司嘅任何產品，佢笑言:「我們只用微軟嘅產品，這毋庸置疑！」。絲絲仲記得，其實幾年前梅琳達接受《紐約時報》訪問時就已強調，蓋茨家族態度是堅定「反Apple」的。
唔通真係同行如敵國，蓋茨夫婦唔會幫襯蘋果公司，之不過，曾有外國記者偷拍到蓋茨女兒疑似手持iPhone嘅照片喎！講開又講，微軟下周一（十六日）將會喺亞特蘭大舉行新產品大會，到時行政總裁納德拉會展示微軟嘅創新產品，又睇吓有乜驚喜！
另外，話就話蓋茨一家人唔吼Apple Watch，但美國一家名為Lumoid嘅創業公司將提供Apple Watch最平嘅運動版手錶和一般版手錶嘅租賃服務，費用為每天45美元和55美元，針對想要試用後再決定是否購買嘅用戶，絲絲心諗，如果有埋18k黃金版畀大家租嚟試戴就更加好囉！
余絲韻